(ណាននីង)​៖ ព្រឹកថ្ងៃ​ទី២៥ ខែមិថុនា ឆ្នាំ២០២៦ — ក្នុងពិធីប្រគល់ពានរង្វាន់ឆ្នើមលើកទី៥ ដល់សិស្ស-និស្សិតអាស៊ាន-ចិន លើស្នាដៃវីដេអូខ្លីក្រោមប្រធានបទ «មិត្តភាព និងកិច្ចសហប្រតិបត្តិការរវាងអាស៊ាន និងចិន» ដែលរៀបចំឡើងដោយ មជ្ឈមណ្ឌលបោះពុម្ពអន្តរជាតិរបស់ប្រទេសចិន នៅភូមិភាគស្វយ័តក្វាងស៊ី លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន បានអំពាវនាវដល់យុវជនចិនឱ្យប្រើប្រាស់ភាពច្នៃប្រឌិត និងបច្ចេកវិទ្យាឌីជីថលក្នុងការផលិតវីដេអូខ្លី ដើម្បីផ្សព្វផ្សាយពីវប្បធម៌ ប្រវត្តិសាស្ត្រ និងសក្តានុពលទេសចរណ៍ដ៏សម្បូរបែបរបស់កម្ពុជា។

លោកបណ្ឌិតបានលើកទឹកចិត្តដល់យុវជនចិនបន្តជ្រើសរើសកម្ពុជាដែលជាគោលដៅសម្រាប់ការផលិតមាតិកាវីដេអូខ្លី ដោយផ្តោតលើបេតិកភណ្ឌវប្បធម៌ ទេសភាពធម្មជាតិ ជីវភាពរស់នៅរបស់ប្រជាជន និងសក្ដានុពលទេសចរណ៍ ដែលមានលក្ខណៈពិសេសរបស់កម្ពុជា។ លោកបណ្ឌិតបានបញ្ជាក់ថា នាយកដ្ឋានភាពយន្ត នៃក្រសួងវប្បធម៌ និងវិចិត្រសិល្បៈ បានសម្តែងការគាំទ្រចំពោះសកម្មភាពផ្លាស់ប្តូរវប្បធម៌ និងការផលិតស្នាដៃវីដេអូខ្លី ដែលអាចរួមចំណែកផ្សព្វផ្សាយរូបភាពកម្ពុជា ទៅកាន់សាធារណជនអន្តរជាតិ ជាពិសេសប្រជាជនចិន។

លោកបណ្ឌិតបញ្ជាក់ដូច្នេះថា៖ «ក្នុងយុគសម័យឌីជីថលបច្ចុប្បន្ន ទំនាក់ទំនងរវាងកម្ពុជា និងចិន មិនមែនស្ថិតនៅ ត្រឹមតែក្របខ័ណ្ឌនៃកិច្ចសហប្រតិបត្តិការសេដ្ឋកិច្ច ឬនយោបាយប៉ុណ្ណោះទេ ប៉ុន្តែវាកំពុងវិវត្តទៅរកភាពស៊ីជម្រៅតាមរយៈ "ការតភ្ជាប់រវាងប្រជាជន និងប្រជាជន"។ ការប្រើប្រាស់ វីដេអូខ្លី និង ការសន្ទនារវាងអរិយធម៌ បានក្លាយជាស្ពានតភ្ជាប់ ដ៏មានប្រសិទ្ធភាពបំផុត ដើម្បីពង្រឹងមិត្តភាពដែកថែបឱ្យកាន់តែរឹងមាំ។»

ក្នុងឱកាសនោះផងដែរ លោកបណ្ឌិត ជា មុនីឫទ្ធិ បានគូសបញ្ជាក់ពីការគាំទ្ររបស់កម្ពុជាចំពោះគំនិតផ្តួចផ្តើមអរិយធម៌សកល និងទិវាអន្តរជាតិសម្រាប់ការសន្ទនារវាងអរិយធម៌ ដោយចាត់ទុកថា ការផ្លាស់ប្តូរវប្បធម៌ និងការសន្ទនារវាងប្រជាជននិងប្រជាជន គឺជាមូលដ្ឋានដ៏សំខាន់សម្រាប់ការពង្រឹងការយោគយល់គ្នា មិត្តភាព និងកិច្ចសហប្រតិបត្តិការប្រកបដោយចីរភាព រវាងកម្ពុជានិងចិន រួមជាមួយបណ្តាប្រទេសទាំងអស់ក្នុងពិភពលោក។

គួរបញ្ជាក់ថា ក្នុងអំឡុងដំណើរទស្សនកិច្ចនៅភូមិភាគស្វយ័តក្វាងស៊ី លោកបណ្ឌិតក៏បានជួបពិភាក្សាជាមួយ ក្រុមហ៊ុនShanhai Xingchen Media Group ដែលជាក្រុមហ៊ុនប្រព័ន្ធផ្សព្វផ្សាយ និងផលិតកម្មភាពយន្តខ្នាតខ្លី (Micro-Drama) ដ៏លេចធ្លោមួយរបស់ប្រទេសចិន ដោយក្រុមហ៊ុននេះត្រូវបានបង្កើតឡើងនៅឆ្នាំ២០២៣ និងមានទីស្នាក់ការកណ្តាល នៅទីក្រុងណាននីង ដោយផ្តោតលើការអភិវឌ្ឍ ផលិត ផ្សព្វផ្សាយ និងចែកចាយរឿងភាគខ្នាតខ្លីតាមប្រព័ន្ធឌីជីថលទាំងក្នុងស្រុក និងអន្តរជាតិ។ ជំនួបនេះបង្ហាញពីឱកាសថ្មីបន្ថែមសម្រាប់ការពង្រឹងកិច្ចសហប្រតិបត្តិការរវាងកម្ពុជានិងចិន ក្នុងវិស័យឧស្សាហកម្មវប្បធម៌ ប្រព័ន្ធផ្សព្វផ្សាយឌីជីថល និងការផលិតមាតិកាច្នៃប្រឌិតលេីការអភិវឌ្ឍវិស័យភាពយន្តខ្នាតខ្លី៕

វិទ្យុមិត្តភាពកម្ពុជាចិន