(ប៉ារីស)៖ ក្រុមហ៊ុនផ្គត់ផ្គង់ថាមពលជាតិបារាំង (EDF) នៅថ្ងៃព្រហស្បតិ៍ បានសម្រេចផ្អាកដំណើរការម៉ាស៊ីនរ៉េអាក់ទ័រនុយក្លេអ៊ែរចំនួន ២គ្រឿង ជាបណ្តោះអាសន្ន ដើម្បីកុំឱ្យទឹកក្តៅដែលបញ្ចេញពីរោងចក្រ ហូរចូលទៅក្នុងទន្លេ និងបំផ្លាញបរិស្ថាន ចំពេលដែលប្រទេសនេះកំពុងប្រឈមនឹងរលកកម្តៅយ៉ាងអាក្រក់បំផុត។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

រោងចក្រថាមពលដែលជាប្រភពផ្គត់ផ្គង់អគ្គិសនីដ៏សំខាន់របស់បារាំង តែងតែបូមទឹកទន្លេដើម្បីប្រើប្រាស់សម្រាប់បញ្ចុះកម្តៅម៉ាស៊ីនរ៉េអាក់ទ័រ ហើយបន្ទាប់មកទឹកដែលក្តៅនោះ នឹងត្រូវបញ្ចេញទៅក្នុងទន្លេវិញ។ ដើម្បីគោរពតាមច្បាប់បរិស្ថាន និងការពារជីវិតរុក្ខជាតិ និងសត្វក្នុងទឹកកុំឱ្យងាប់ដោយសារការកើនឡើងកម្តៅទឹកទន្លេ ក្រុមហ៊ុន EDF ត្រូវបង្ខំចិត្តផ្អាកម៉ាស៊ីនរ៉េអាក់ទ័រនៅរោងចក្រ Nogent-sur-Seine និង Bugey។ កន្លងមក ក្រុមហ៊ុនក៏បានបញ្ជាឱ្យកាត់បន្ថយផលិតកម្មនៅតាមរោងចក្រផ្សេងៗទៀត និងបានបិទម៉ាស៊ីនរ៉េអាក់ទ័រមួយគ្រឿងនៅរោងចក្រ Golfech រួចមកហើយ។

គួរបញ្ជាក់ថា ទោះបីជារោងចក្រនុយក្លេអ៊ែរគឺជាប្រភពផ្គត់ផ្គង់អគ្គិសនីជិត ៧០ភាគរយ របស់បារាំងកាលពីឆ្នាំមុនក៏ដោយ ប៉ុន្តែប្រតិបត្តិករគ្រប់គ្រងបណ្តាញអគ្គិសនីបានធានាអះអាងថា ប្រទេសបារាំងនៅតែមានកម្លាំងផលិតអគ្គិសនីគ្រប់គ្រាន់ ដើម្បីបំពេញតម្រូវការប្រើប្រាស់របស់ប្រជាពលរដ្ឋ ទោះបីជាមានការផ្អាកដំណើរការរោងចក្រមួយចំនួនក៏ដោយ៕