(ហ្ស៊េរុយសាឡឹម)៖ រដ្ឋាភិបាលអ៊ីស្រាអែល នៅថ្ងៃព្រហស្បតិ៍ បានប្រកាសយ៉ាងដាច់អហង្ការថា កងទ័ពរបស់ខ្លួននឹងដកចេញពីភាគខាងត្បូងប្រទេសលីបង់ លុះត្រាតែក្រុមហេសបូឡា ត្រូវបានរំសាយអាវុធទាំងស្រុង។ ការបញ្ជាក់ជំហរនេះធ្វើឡើង ខណៈដែលប្រទេសទាំងពីរកំពុងចូលរួមក្នុងកិច្ចចរចាដែលសម្របសម្រួលដោយសហរដ្ឋអាមេរិក នៅក្នុងទីក្រុងវ៉ាស៊ីនតោន។

លោក ដេវីដ មិនសឺ (David Mencer) អ្នកនាំពាក្យរដ្ឋាភិបាលអ៊ីស្រាអែល បានប្រាប់អ្នកសារព័ត៌មានថា អ៊ីស្រាអែលនឹងមិនដកកងទ័ពចេញពីភាគខាងត្បូងលីបង់ដាច់ខាត ដរាបណាក្រុមហេសបូឡានៅតែជាការគំរាមកំហែង និងមិនព្រមរំសាយអាវុធ។ លោកបានសង្កត់ធ្ងន់ថា ការដកទ័ពរបស់កងកម្លាំងការពារអ៊ីស្រាអែល (IDF) នឹងកើតឡើងនៅក្រោយពេលដែលភាគខាងត្បូងលីបង់ក្លាយជាតំបន់គ្មានកងទ័ព និងក្រោយពេលដែលក្រុមហេសបូឡារំសាយអាវុធរួចរាល់តែប៉ុណ្ណោះ។

គួរបញ្ជាក់ថា អ៊ីស្រាអែលបានបើកការវាយប្រហារតាមអាកាសយ៉ាងសន្ធឹកសន្ធាប់ និងបញ្ជូនកងទ័ពចូលទៅភាគខាងត្បូងលីបង់ បន្ទាប់ពីក្រុមប្រដាប់អាវុធហេសបូឡា ដែលគាំទ្រដោយអ៊ីរ៉ង់ បានលូកដៃចូលក្នុងសង្គ្រាមមជ្ឈិមបូព៌ាកាលពីខែមីនា ដើម្បីគាំទ្រទីក្រុងតេហេរ៉ង់។ ក្រោមសម្ពាធពីសហរដ្ឋអាមេរិក មន្ត្រីលីបង់បានយល់ព្រមចរចាដោយផ្ទាល់ជាមួយអ៊ីស្រាអែលនៅវ៉ាស៊ីនតោនតាំងពីខែមេសា ខណៈកិច្ចចរចាជុំចុងក្រោយរយៈពេល ៣ថ្ងៃនេះ គ្រោងនឹងបញ្ចប់នៅថ្ងៃព្រហស្បតិ៍នេះ។ រដ្ឋមន្ត្រីការបរទេសអាមេរិក លោក ម៉ាកូ រូប៊ីយ៉ូ (Marco Rubio) បានបង្ហើបថា ប្រទេសជិតខាងទាំងពីរកំពុងខិតជិតដល់ការសម្រេចបាន «ការប្តេជ្ញាចិត្តជាគោលការណ៍» មួយហើយ៕