(បេរូត)៖ ប្រព័ន្ធផ្សព្វផ្សាយរដ្ឋលីបង់បានរាយការណ៍ថា កងកម្លាំងអ៊ីស្រាអែល នៅថ្ងៃសុក្រនេះ បានទម្លាក់ខិត្តប័ណ្ណពីលើអាកាស ទៅលើទីក្រុងម៉ាន់ស៊ូរី (Mansouri) ភាគខាងត្បូងប្រទេសលីបង់ ដើម្បីបង្គាប់ឱ្យប្រជាពលរដ្ឋជម្លៀសខ្លួនចេញជាបន្ទាន់។ នេះគឺជាការបញ្ជាជម្លៀសខ្លួនលើកដំបូងបង្អស់ ចាប់តាំងពីបទឈប់បាញ់រវាងអ៊ីស្រាអែល និងក្រុមហេសបូឡា បានចូលជាធរមានមក។

មន្ត្រីយោធាជាន់ខ្ពស់លីបង់មួយរូប បានបញ្ជាក់ថា ថ្មីៗនេះ អ៊ីស្រាអែលទើបតែបានបញ្ចូលទីក្រុងម៉ាន់ស៊ូរី ទៅក្នុងតំបន់ដែលកាន់កាប់ដោយកងទ័ពរបស់ខ្លួន នៅក្នុងទឹកដីភាគខាងត្បូងលីបង់។ មន្ត្រីលីបង់បានចោទប្រកាន់ថា កងទ័ពអ៊ីស្រាអែលកំពុងរឹតបន្តឹងការគ្រប់គ្រងនៅតាមព្រំប្រទល់ខាងជើងនៃតំបន់កាន់កាប់នោះ ដោយបានបាញ់ប្រហារទៅលើជនណាក៏ដោយដែលហ៊ានចូលទៅក្បែរ រួមទាំងជនស៊ីវិល និងទាហានលីបង់ផងដែរ។

មន្ត្រីយោធារូបនេះបានបន្ថែមថា កន្លងមក កសិករនៅតែបន្តចេញចូលទីក្រុងម៉ាន់ស៊ូរីដើម្បីប្រកបរបររបស់ខ្លួន ប៉ុន្តែពួកគេមិនបានស្នាក់នៅទីនោះអចិន្ត្រៃយ៍ឡើយ។ ការទម្លាក់ខិត្តប័ណ្ណបញ្ជាឱ្យជម្លៀសខ្លួននេះ បានធ្វើឱ្យមានការព្រួយបារម្ភយ៉ាងខ្លាំងពីការកើនឡើងភាពតានតឹងសាជាថ្មី បើទោះបីជាភាគីទាំងពីរទើបតែបានយល់ព្រមលើបទឈប់បាញ់ក៏ដោយ៕