(ឌូបៃ)៖ អាជ្ញាធរនៃប្រទេសអេមីរ៉ាតអារ៉ាប់រួម (UAE) នៅថ្ងៃសុក្រ បានចាក់សំឡេងប្រកាសអាសន្នព្រមានពីការវាយប្រហារដោយមីស៊ីលនៅក្នុងទីក្រុងឌូបៃ ប៉ុន្តែភ្លាមៗនោះក៏មានសារព្រមានទីពីរ ដើម្បីប្រាប់សាធារណជនកុំឱ្យខ្វល់ខ្វាយពីការប្រកាសអាសន្នលើកទីមួយនោះ។ នេះបើតាមការចេញផ្សាយដោយសារព័ត៌មាន​​ Arab News។

ប៉ុន្មាននាទីក្រោយមក អាជ្ញាធរបានប្រកាសថាស្ថានភាពមានសុវត្ថិភាពជាធម្មតាវិញ ប៉ុន្តែមិនបានបញ្ជាក់ពីមូលហេតុនៃការប្រកាសអាសន្ននេះឡើយ។ មកទល់ពេលនេះ គេនៅមិនទាន់ដឹងច្បាស់ថា តើអ្វីដែលបណ្តាលឱ្យមានការប្រកាសអាសន្នដំបូងនៅវេលាម៉ោងប្រមាណ ៥:១៥នាទីល្ងាច (ម៉ោងក្នុងតំបន់) នោះទេ។

គួរបញ្ជាក់ថា ហេតុការណ៍ប្រកាសអាសន្ននេះ កើតឡើងស្របពេលដែលមានការសង្ស័យថា ប្រទេសអ៊ីរ៉ង់បានប្រើប្រាស់យន្តហោះដ្រូន វាយប្រហារលើនាវាដឹកប្រេងមួយគ្រឿងនៅឆ្នេរសមុទ្រអូម៉ង់កាលពីថ្ងៃព្រហស្បតិ៍។ សកម្មភាពនេះបង្ហាញថា ទីក្រុងតេហេរ៉ង់ កំពុងបង្កើនការប្រឈមមុខដាក់គ្នាជាមួយបណ្តាប្រទេសក្នុងតំបន់ និងសហរដ្ឋអាមេរិក ជុំវិញការគ្រប់គ្រងច្រកសមុទ្រហ័រមូស ទោះបីជាបច្ចុប្បន្នមានកិច្ចព្រមព្រៀងសន្តិភាពបណ្តោះអាសន្នក៏ដោយ៕