(ម៉ូស្គូ)៖ អតីតរដ្ឋមន្ត្រីការពារជាតិរុស្ស៊ី លោក សឺហ្គី អ៊ីវ៉ាណូវ (Sergei Ivanov) ដែលធ្លាប់ត្រូវបានគេមើលឃើញថាជាអ្នកបន្តវេនដ៏សក្តិសមបំផុតរបស់ប្រធានាធិបតី លោក វ្ល៉ាឌីមៀ ពូទីន បានទទួលមរណភាពហើយ ក្នុងជន្មាយុ ៧៣ឆ្នាំ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក អ៊ីវ៉ាណូវ គឺជាសមាជិកដ៏សំខាន់នៃក្រុម «បុរសខ្លាំង» (Siloviki) របស់រុស្ស៊ី ដែលលោកបានកសាងកេរ្តិ៍ឈ្មោះពីស្ថាប័នសន្តិសុខសូវៀត KGB ដូចលោក ពូទីន ដែរ ហើយលោកមានឥទ្ធិពលយ៉ាងខ្លាំងនៅពេលដែលលោក ពូទីន ឡើងកាន់អំណាច។ មរណភាពរបស់លោក ត្រូវបានប្រកាសដំបូងដោយលីគកីឡាបាល់បោះ VTB United League ដែលលោកជាប្រធានកិត្តិយស មុនពេលវិមានក្រឹមឡាំង ចេញមុខបញ្ជាក់ជាផ្លូវការនៅពេលក្រោយ។

លោក អ៊ីវ៉ាណូវ បានដើរតួនាទីយ៉ាងសំខាន់ក្នុងការកសាងរចនាសម្ព័ន្ធសន្តិសុខរបស់រុស្ស៊ីក្រោយសម័យសូវៀត និងបានគ្រប់គ្រងកងកម្លាំងប្រដាប់អាវុធក្នុងអាណត្តិដំបូងៗរបស់លោក ពូទីន។ លោកបានកាន់តំណែងជារដ្ឋមន្ត្រីការពារជាតិកំឡុងសង្គ្រាមឆេចនី (Chechnya) លើកទីពីរ ដែលលោក ពូទីន បានបើកយុទ្ធនាការកម្ទេចក្រុមឧទ្ទាមបំបែករដ្ឋ។ ក្នុងនាមជាមន្ត្រីដែលចេះភាសាអង់គ្លេសស្ទាត់ជំនាញ លោកតែងតែបង្ហាញខ្លួនជាបុគ្គលដ៏មុតស្រួចនៅលើឆាកអន្តរជាតិ ជាពិសេសក្នុងសន្និសីទសន្តិសុខទីក្រុងមុយនិច (Munich Security Conference) ដោយតែងតែរិះគន់គម្រោងខែលការពារមីស៊ីលរបស់អាមេរិក និងការពង្រីកឥទ្ធិពលរបស់ណាតូ។

កន្លងមក លោកតែងតែសង្កត់ធ្ងន់ថា ការពង្រីករបស់ណាតូគឺជាការគំរាមកំហែងដល់សន្តិសុខរុស្ស៊ី ហើយអះអាងថាសន្តិសុខនៅអឺរ៉ុប គួរតែផ្អែកលើការគោរពផលប្រយោជន៍របស់គ្រប់ភាគី។ ទឡ្ហីករណ៍នេះហើយ ដែលក្រោយមកលោក ពូទីន បានយកមកធ្វើជាសំអាង ដើម្បីបញ្ជាក់ពីភាពត្រឹមត្រូវនៃការឈ្លានពានលើប្រទេសអ៊ុយក្រែន កាលពីឆ្នាំ២០២២ កន្លងទៅ បើទោះបីជាទីក្រុងកៀវ និងលោកខាងលិចចាត់ទុកថាជាលេសក៏ដោយ៕