(វ៉ាស៊ីនតោន)៖ ក្រសួងយុត្តិធម៌អាមេរិក បានឱ្យដឹងនៅថ្ងៃសុក្រ ទី២៦ ខែមិថុនា ឆ្នាំ២០២៦ ថាសហរដ្ឋអាមេរិកបានបិទគេហទំព័រជិត ៤០០ ដែលត្រូវបានប្រើប្រាស់ដោយខុសច្បាប់ក្នុងការផ្សាយ ព្រឹត្តិការណ៍កីឡាបាល់ពិភពលោក World Cup ជាចំណាត់ការមួយដើម្បីទប់ស្កាត់ការកេងចំណេញជាបណ្ដាញអន្តរជាតិពីព្រឹត្តិការណ៍ពិភពលោកដ៏មានប្រជាប្រិយមួយនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រសួងយុត្តិធម៌អាមេរិកបាននិយាយថាការបិទគេហទំព័រខាងលើត្រូវបានធ្វើឡើងក្រោមកិច្ចសហប្រតិបត្តិការជាមួយស្ថាប័ន ​FIFA និងស្ថាប័នដទៃទៀតដូចជា NBC Universal និង Warner Brothers។ គេហទំព័រទាំងនោះត្រូវបានប្រើប្រាស់ដោយខុសច្បាប់ដោយរំលោភលើកម្មសិទ្ធិបញ្ញាក្នុងការផ្សាយព្រឹត្តិការណ៍បាល់ទាត់ពិភពលោក។ ក្នុងសេចក្ដីថ្លែងការណ៍មួយ ក្រសួងយុត្តិធម៌អាមេរិក បានគូសបញ្ជាក់ដូច្នេះថា «ការផ្សាយទាំងនោះមិនត្រឹមតែរំលោភលើកម្មសិទ្ធិបញ្ញាប៉ុណ្ណោះទេ តែក៏បានធ្វើឱ្យអ្នកទស្សនាប្រឈមនឹងការគំរាមកំហែងក្នុងនោះរួមមានការវាយប្រហារព័ត៌មានវិទ្យាផងដែរ តាមរយៈដំណរភ្ជាប់ដោយគ្មានសុវត្ថិភាពដែលអាចធ្វើឱ្យទិន្នន័យហិរញ្ញវត្ថុ និងព័ត៌មានផ្ទាល់ខ្លួនប្រឈមនឹងការ Hack»។

តាមក្រសួងយុត្តិធម៌អាមេរិក Servers និងគេហទំព័រដែលត្រូវបានបិទ គឺធ្វើប្រតិបត្តិការនៅក្នុងប្រទេសបេរូ និងប៊ុលហ្ការី ហើយក្រសួងក៏បានចាត់វិធានការបែបនេះក្នុងប្រទេសក្រូអាស៊ី រូម៉ានី ប៉ូឡូញ និងកូឡុំប៊ីដែរ។

គួរបញ្ជាក់ថា ព្រឹត្តិការណ៍បាល់ទាត់ពិភពលោក World Cup បានចាប់ផ្ដើមឡើងកាលពីថ្ងៃទី១១ ខែមិថុនា នៅក្នុងសហរដ្ឋអាមេរិក កាណាដា និងម៉ិកស៉ិក។ ព្រឹត្តិការណ៍នេះនឹងត្រូវបន្តប្រព្រឹត្តទៅ នៅក្នុងទីក្រុងចំនួន១៦ នៃប្រទេសទាំង៣ រហូតដល់ថ្ងៃទី១៩ ខែកក្កដា៕