(មជ្ឈិមបូព៌ា)៖ ទីភ្នាក់ងារសន្តិសុខដែនសមុទ្ររបស់ចក្រភពអង់គ្លេស បានឱ្យដឹងថា នាវាដឹកប្រេងមួយគ្រឿងបានរាយការណ៍ពីការវាយប្រហារដោយគ្រាប់ផ្លោងនៅឯច្រកសមុទ្រ Hormuz នាថ្ងៃសៅរ៍នេះ បន្ទាប់ពីសហរដ្ឋអាមេរិក និងអ៉ីរ៉ង់វាយប្រហារដាក់គ្នាទៅវិញទៅមក គិតចាប់តាំងពីការចុះហត្ថលេខាលើអនុស្សារណៈយោគយល់ (MOU)។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters​ នៅថ្ងៃសៅរ៍​ ទី២៧​ ខែមិថុនា​ ឆ្នាំ២០២៦។

ការវាយប្រហារនាថ្ងៃសៅរ៍លើកប៉ាល់ដឹកប្រេងនៅច្រកសមុទ្រ Hormuz កេីតមានឡើងបន្ទាប់ពីការវាយប្រហារលើកប៉ាល់ដឹកទំនិញកាលពីថ្ងៃព្រហស្បតិ៍​ បង្កជាភាពតានតឹង។ អ៉ីរ៉ង់បានអះអាងការគ្រប់គ្រងច្រកសមុទ្រ Hormuz ដែលទេីបនឹងបើកបានពីរសប្តាហ៍ចុងក្រោយ​ បន្ទាប់ពីមានការរំខានជាច្រើនខែ។

តាមទីភ្នាក់ងារសន្តិសុខដែនសមុទ្រ UKMTO របស់ចក្រភពអង់គ្លេស កប៉ាល់ដឹកប្រេងបានខូចខាតតួរបស់វា​ ហេីយក្រុមនាវិកទាំងអស់មានសុវត្ថិភាព។ មជ្ឈមណ្ឌលព័ត៌មានដែនសមុទ្ររួម ដែលដំណើរការដោយសម្ព័ន្ធកងទ័ពជើងទឹកដេីម្បីការពារការដឹកជញ្ជូន បានបង្កើនកម្រិតព្រមានអំពីគំរាមកំហែងសន្តិសុខ ក្រោយកេីតឧប្បត្តិហេតុថ្មីៗនេះ។

អ៉ីរ៉ង់ មិនបានធ្វើអត្ថាធិប្បាយដោយផ្ទាល់ ពាក់ព័ន្ធសេចក្តីរាយការណ៍នៃការវាយប្រហារកប៉ាល់នោះទេ ប៉ុន្តែទូរទស្សន៍រដ្ឋអ៉ីរ៉ង់ រាយការណ៍ថាកងកម្លាំងឆ្មាំបដិវត្តន៍បានបាញ់ព្រមានទៅកប៉ាល់ ដែលប៉ុនប៉ងឆ្លងកាត់ច្រកសមុទ្រ Hormuz ដែលអ៉ីរ៉ង់មិនអនុញ្ញាត ហើយថាពេលនេះកំពុងជំរុញឱ្យនាវាផ្សេងទៀតស្វែងរកការអនុញ្ញាតពីអ៉ីរ៉ង់មុនពេលចង់ឆ្លងកាត់៕