(លីសបោន)៖ វិទ្យាស្ថានសមុទ្រ និងបរិយាកាសព័រទុយហ្គាល់ (IPMA) បានឱ្យដឹងថា នៅថ្ងៃអាទិត្យនេះ គ្រោះរញ្ជួយដីកម្រិត ៤,១រ៉ិចទ័រ បានវាយប្រហារលើតំបន់ទេសចរណ៍ Algarve ភាគខាងត្បូងប្រទេសព័រទុយហ្គាល់ ប៉ុន្តែហាក់ដូចជាមិនបង្កឱ្យមានមនុស្សរងរបួស ឬការខូចខាតទ្រព្យសម្បត្តិអ្វីឡើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

IPMA បានបញ្ជាក់ថា គ្រោះរញ្ជួយដីនេះបានកើតឡើងនៅវេលាម៉ោង ៧:៥៩នាទីព្រឹក (ម៉ោងក្នុងតំបន់)​​ ដោយមានចំណុចកណ្តាលស្ថិតក្នុងមហាសមុទ្រអាត្លង់ទិក ចម្ងាយប្រមាណ ៧០គីឡូម៉ែត្រពីតំបន់ Cape St. Vincent។

គួរបញ្ជាក់ថា​ ប្រទេសព័រទុយហ្គាល់ធ្លាប់ឆ្លងកាត់ប្រវត្តិសាស្រ្តដ៏ជូរចត់ ដោយកាលពីឆ្នាំ១៧៥៥ គ្រោះរញ្ជួយដី និងរលកយក្សស៊ូណាមិ បានសម្លាប់មនុស្សចន្លោះពី ៣០,០០០ ទៅ ៤០,០០០នាក់ ដែលជាព្រឹត្តិការណ៍រញ្ជួយដីដ៏សាហាវបំផុតក្នុងប្រវត្តិសាស្ត្រអឺរ៉ុប។ ចាប់តាំងពីពេលនោះមក តំបន់នេះកាលពីឆ្នាំ១៩៦៩​ ក៏ធ្លាប់មានគ្រោះរញ្ជួយដីកម្រិត ៧,៩រ៉ិចទ័រ ដែលបានសម្លាប់មនុស្ស ១៣នាក់ផងដែរ៕