(ការ៉ាជី)៖ យោធាប៉ាគីស្ថានបានប្រកាសកាលពីថ្ងៃសៅរ៍ថា ការវាយប្រហារដោយគ្រាប់បែក និងការបាញ់ប្រហារទៅលើទីស្នាក់ការកងកម្លាំង Rangers ក្នុងទីក្រុងការ៉ាជី (Karachi) បានបណ្តាលឱ្យកងកម្លាំងប៉ាគីស្ថានចំនួន ៣នាក់ស្លាប់ និង ៤នាក់រងរបួស។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រុមសកម្មប្រយុទ្ធ Jamaat-ul-Ahrar ដែលជាសាខារបស់ក្រុមតាលីបង់ប៉ាគីស្ថាន បានបំផ្ទុះគ្រាប់បែកនៅច្រកចូលជំរំ រួចបើកការបាញ់ប្រហារទៅលើកងកម្លាំង។ យោធាបានបញ្ជាក់ថា ក្នុងការប៉ះទង្គិចគ្នាប្រមាណ ១៥នាទីនោះ ក្រុមសកម្មប្រយុទ្ធ ៣នាក់ត្រូវបានសម្លាប់ ខណៈម្នាក់ទៀតជាជនជាតិអាហ្វហ្គានីស្ថានត្រូវបានចាប់ខ្លួន។ យោធាបានសង្កត់ធ្ងន់ថា ប៉ាគីស្ថាននឹងចាត់វិធានការសងសឹកយ៉ាងចាស់ដៃចំពោះអ្នកនៅពីក្រោយអំពើនេះ។

ការវាយប្រហារនេះ អាចនឹងដុតបញ្ឆេះជម្លោះជាថ្មីរវាងប៉ាគីស្ថាន និងអាហ្វហ្គានីស្ថាន ដោយទីក្រុងអ៊ីស្លាម៉ាបាដ អាចនឹងបើកការវាយប្រហារតាមអាកាសឆ្លងដែនបន្ថែមទៀត។ កន្លងមក ប៉ាគីស្ថានតែងតែចោទប្រកាន់ទីក្រុងកាប៊ុល ថាបានផ្តល់ជម្រកដល់ក្រុមសកម្មប្រយុទ្ធ ដែលរដ្ឋាភិបាលតាលីបង់អាហ្វហ្គានីស្ថានតែងតែបដិសេធ។

គួរបញ្ជាក់ថា នេះគឺជាការវាយប្រហារដ៏ធំបំផុតនៅក្នុងទីក្រុងការ៉ាជី ចាប់តាំងពីករណីបំផ្ទុះគ្រាប់បែកសម្លាប់ជនជាតិចិន ២នាក់ កាលពីចុងឆ្នាំ២០២៤ មកម្ល៉េះ ខណៈដែលអំពើហិង្សានៅទីក្រុងធំៗកម្រនឹងកើតមានខ្លាំងណាស់ក្នុងរយៈពេលប៉ុន្មានឆ្នាំចុងក្រោយនេះ៕