(ញូវដេលី)៖ អតីតមេដឹកនាំបង់ក្លាដែសដែលកំពុងរត់គេចខ្លួន លោកស្រី សេក្ខ ហាស៊ីណា (Sheikh Hasina) បានប្រកាសប្តេជ្ញាថានឹងត្រឡប់ទៅកាន់ប្រទេសកំណើតរបស់លោកស្រីវិញ «ក្នុងឆ្នាំនេះ» បើទោះបីជាលោកស្រីទើបតែត្រូវបានតុលាការកាត់ទោសប្រហារជីវិតកំបាំងមុខ ពីបទឧក្រិដ្ឋកម្មប្រឆាំងមនុស្សជាតិ កាលពីប៉ុន្មានខែមុនក៏ដោយ។​​​ នេះបើយោងតាមការចេញផ្សាយដោយ​សារព័ត៌មាន CNA។

លោកស្រី ហាស៊ីណា អាយុ ៧៨ឆ្នាំ បានរត់ភៀសខ្លួនទៅកាន់ប្រទេសជិតខាងឥណ្ឌា កាលពីខែសីហា ឆ្នាំ២០២៤ បន្ទាប់ពីមានការបះបោរដឹកនាំដោយនិស្សិត ដែលបានបញ្ចប់ការគ្រប់គ្រងបែបផ្តាច់ការរយៈពេល ១៥ឆ្នាំរបស់លោកស្រី។ នៅក្នុងបទសម្ភាសន៍ជាមួយទូរទស្សន៍ឥណ្ឌា NDTV លោកស្រីបានបញ្ជាក់យ៉ាងច្បាស់ថា លោកស្រីមិនខ្លាចសេចក្តីស្លាប់នោះទេ ហើយបានចាត់ទុកសាលក្រមកាត់ទោសលោកស្រីថាជា «ដំណើរការខុសច្បាប់ ផ្ទុយពីរដ្ឋធម្មនុញ្ញ និងមានចេតនានយោបាយ»។

អតីតមេដឹកនាំរូបនេះបានសង្កត់ធ្ងន់ថា «មានការរៀបចំផែនការទុច្ចរិតជាច្រើនប្រឆាំងនឹងខ្ញុំ។ ប៉ុន្តែ... ខ្ញុំត្រូវបានប្រជាជនបោះឆ្នោតជ្រើសរើសជានាយករដ្ឋមន្ត្រីរហូតដល់ ៥ដង ហើយខ្ញុំបានបម្រើប្រទេសជាតិឱ្យមានការអភិវឌ្ឍដែលមិនធ្លាប់មានពីមុនមក។ ខ្ញុំចង់ប្រាប់ឱ្យច្បាស់ថា ទោះមានឧបសគ្គបែបណាក៏ដោយ ខ្ញុំនឹងត្រឡប់ទៅប្រទេសរបស់ខ្ញុំវិញនៅក្នុងឆ្នាំនេះ»។

គួរបញ្ជាក់ថា កាលពីខែវិច្ឆិកា ឆ្នាំមុន តុលាការទីក្រុងដាកា (Dhaka) បានផ្តន្ទាទោសប្រហារជីវិតលោកស្រី ដោយចោទប្រកាន់ពីបទញុះញង់ បញ្ជាឱ្យសម្លាប់ និងការអសកម្មក្នុងការទប់ស្កាត់អំពើឃោរឃៅ ខណៈសកម្មភាពរបស់គណបក្ស Awami League របស់លោកស្រី ក៏ត្រូវបានហាមឃាត់ផងដែរ។ បច្ចុប្បន្ន ទំនាក់ទំនងរវាងឥណ្ឌា និងបង់ក្លាដែស មានភាពប្រសើរឡើងវិញ បន្ទាប់ពីនាយករដ្ឋមន្ត្រីថ្មី លោក តារីក រ៉ាម៉ាន់ (Tarique Rahman) ទទួលបានជ័យជម្នះភ្លូកទឹកភ្លូកដីកាលពីខែកុម្ភៈ ប៉ុន្តែភាពតានតឹងនៅតែបន្តមាន ដោយសារបង់ក្លាដែសតែងតែទាមទារឱ្យឥណ្ឌាបញ្ជូនខ្លួនលោកស្រី ហាស៊ីណា ត្រឡប់មកវិញដើម្បីកាត់ទោស៕