(មូស្គូ)៖ នៅក្នុងបទសម្ភាសមួយផ្សព្វផ្សាយតាមវិមានក្រឹមឡាំង ប្រធានាធិបតីរុស្ស៉ី លោក វ្ល៉ាឌីមៀ ពូទីន បានទទួលស្គាល់ថាប្រទេសរបស់លោក បានរងផលប៉ះពាល់ពីកង្វះខាតប្រេងឥន្ធនៈប្រាកដមែន បន្ទាប់ពីការវាយប្រហារតាមផ្លូវអាកាសរបស់អ៊ុយក្រែន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី២៩ ខែមិថុនា ឆ្នាំ២០២៦។

លោក ពូទីន គូសបញ្ជាក់ថា «ចំពោះការវាយប្រហារលើហេដ្ឋារចនាសម្ព័ន្ធសំខាន់ៗជាទូទៅ និងពិសេសលើហេដ្ឋារចនាសម្ព័ន្ធថាមពល ពិណាស់ ការវាយប្រហារទាំងនោះបានបង្កើតបញ្ហាឱ្យយើង។ ឥឡូវ យើងកំពុងសង្កេតមើលភាពខ្វះខាតជាក់លាក់ ប៉ុន្តែវាមិនធ្ងន់ធ្ងរទេ»។

តាមលោក ពូទីន ភារកិច្ច​ចម្បង​សម្រាប់ពេល​នេះ គឺ​បង្កើន​សមត្ថភាព​ប្រឆាំង​យន្តហោះ​ដ្រូន និង​ធានា​ការ​ផ្គត់ផ្គង់​ប្រេងឥន្ធនៈ ជាពិសេស​ទៅ​កាន់​តំបន់​គ្រីមៀ។ នៅក្នុងបទសម្ភាសន៍ដដែល លោក ពូទីន ក៏បានបង្ហាញក្តីរំពឹងថា ក្រុមអ្នកចរចាអាមេរិកនឹងទៅទីក្រុងមូស្គូ ដើម្បីពិភាក្សាពីការបញ្ចប់សង្រ្គាមអ៊ុយក្រែន នៅពេលដែលទីក្រុងវ៉ាស៉ីនតោន លែងរវល់ជាមួយការដោះស្រាយសង្រ្គាមអ៉ីរ៉ង់។

សុន្ទរកថារបស់លោក ពូទីន បានកើតឡើងប៉ុន្មានម៉ោង បន្ទាប់ពីការវាយប្រហារដោយដ្រូនរបស់អ៊ុយក្រែន សម្លាប់មនុស្សម្នាក់នៅក្នុងតំបន់ Krasnodar ភាគខាងត្បូងប្រទេសរុស្ស៉ី និងបានបង្កអគ្គីភ័យក្នុងរោងចក្រចម្រាញ់ប្រេង។ នេះបើយោងតាមអភិបាលតំបន់ លោក Veniamin Kondratyev។ ទីក្រុងកៀវ ចាត់ទុកការវាយ​ប្រហារ​នោះ ​ជា​ការ​សងសឹក​ទៅនឹងការវាយប្រហារជាប់ជាប្រចាំរបស់​រុស្ស៉ី លើ​ជន​ស៊ីវិល​អ៊ុយក្រែន និង​ហេដ្ឋារចនាសម្ព័ន្ធ​ថាមពល​ ចាប់​តាំង​ពី​បើកការឈ្លានពាន​ក្នុង​ខែ​កុម្ភៈ ឆ្នាំ​២០២២៕