(អ៉ីស្លាម៉ាបាដ)៖ នៅថ្ងៃចន្ទ ទី២៩ ខែមិថុនា ឆ្នាំ២០២៦ ប៉ាគីស្ថានបានឱ្យដឹងថា កាលពីវេលាយប់កន្លងទៅនេះ ខ្លួនបានបើកការវាយប្រហារតាមផ្លូវអាកាស និងប្រតិបត្តិការតាមជើងគោក នៅភាគខាងកើតប្រទេសអាហ្វហ្កានីស្ថាន ដែលបានផ្តាច់ជីវិតជនសកម្មប្រយុទ្ធ២៥នាក់ ដើម្បីឆ្លើយតបការវាយប្រហារនាពេលថ្មីៗនេះ នៅក្នុងប្រទេសរបស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ទីក្រុងអ៉ីស្លាម៉ាបាដ បាននិយាយថា យោធាប៉ាគីស្ថាន បានវាយប្រហារតាមអាកាស នៅតំបន់ភាគខាងកើតអាហ្វហ្កានីស្ថាន ដោយកំណត់គោលដៅលើក្រុមសកម្មប្រយុទ្ធ ហើយគោលដៅចំនួន៣ នៅក្នុងខេត្ត Paktia, Paktika និង Kunar របស់អាហ្វហ្កានីស្ថាន ត្រូវបានកម្ទេច ខណៈជនសកម្មប្រយុទ្ធ២៥នាក់ ត្រូវបានសម្លាប់។ ទន្ទឹមគ្នា ក៏រួមមានប្រតិបត្តិការវាយលុក​តាមជើងគោក នៅតំបន់ព្រំប្រទល់ផងដែរ ដោយកំណត់គោលដៅលើក្រុមសកម្មប្រយុទ្ធ ហៅថា Jamaat-ul-Ahrar ដែលជារឿយៗមានទំនាក់ទំនងជាមួយក្រុមសកម្មប្រយុទ្ធ Tehreek-e-Taliban Pakistan (TTP)។

ប៉ាគីស្ថាន បាននិយាយថា ប្រតិបត្តិការទាំងនេះ គឺជាការឆ្លើយតបចំពោះការវាយប្រហារមួយ ដែលបានសម្លាប់កងកម្លាំងទាហានប៉ារ៉ា៣នាក់ នៅទីក្រុង Karachi ភាគខាងត្បូងប្រទេសរបស់ខ្លួន កាលពីថ្ងៃសៅរ៍ចុងសប្តាហ៍មុន ក៏ដូចជាសម្រាប់ការកើតមានអំពើហិង្សានាពេលថ្មីៗនេះ នៅតាមបណ្តាខេត្តជាប់ព្រំដែន។

ទីក្រុងអ៉ីស្លាម៉ាបាដ ចោទប្រកាន់រដ្ឋាភិបាលតាលីបង់ ថាផ្តល់កន្លែងជ្រកកោនដល់ក្រុមសកម្មប្រយុទ្ធ ដែលស្ថិតនៅពីក្រោយការកើនឡើង​នៃករណីវាយប្រហារក្នុងប្រទេសប៉ាគីស្ថាន ជាពិសេសក្រុម TTP ដែលបានធ្វើយុទ្ធនាការបង្កហិង្សាប្រឆាំងប៉ាគីស្ថាន អស់រយៈពេលជាច្រើនឆ្នាំមកហើយ។ ទីក្រុងកាប៊ុលច្រានចោលការចោទប្រកាន់នេះ និងបន្ទោសត្រឡប់ទៅវិញថា ករណីវាយប្រហារទាំងនោះ គឺមកពីកម្សោយនៃសមត្ថភាពការពារសន្តិសុខរបស់ប៉ាគីស្ថានផ្ទាល់។

គួរបញ្ជាក់ថា ព្រំប្រទល់រវាងប្រទេសជិតខាងទាំងពីរ គឺនៅបន្តបិទសឹងតែទាំងស្រុង ចាប់តាំងពីមានការប៉ះទង្គិចគ្នាខ្លាំង កាលពីខែតុលា ឆ្នាំ២០២៥ ជាហេតុនាំឱ្យការធ្វើពាណិជ្ជកម្មទ្វេភាគីជាប់គាំង៕