(អឺរ៉ុប)៖ សហភាពអឺរ៉ុប (EU) និងចិន នឹងវាស់ស្ទង់ថាតើជម្លោះពាណិជ្ជកម្ម អាចដោះស្រាយបាន តាមរយៈការពិភាក្សានាថ្ងៃចន្ទនេះឬទេ ពេលដែលមន្ត្រីពាណិជ្ជកម្មកំពូល EU លោក Maros Sefcovic ទទួលស្វាគមន៍សមភាគីចិន លោក Wang Wentao នៅទីក្រុងព្រុចសែល សម្រាប់ការពិភាក្សាគ្នាពេញមួយថ្ងៃ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី២៩ ខែមិថុនា ឆ្នាំ២០២៦។

EU បានបង្វែរការយកចិត្តទុកដាក់របស់ខ្លួនចំពោះចិន ខណៈដែលទីក្រុងព្រុចសែល បារម្ភពីការកើនឡើងនូវអតុល្យភាពពាណិជ្ជកម្ម ក្នុងចំណោមប្រទេសទាំង ២៧នៃប្លុក ជាមួយមហាអំណាចអាស៉ី។ ទីក្រុងព្រុចសែល ​បារម្ភថាឧស្សាហកម្មមួយចំនួននឹងបាត់បង់ទាំងស្រុង ប្រសិនបើមិនចាត់វិធានការប្រឆាំងទំនិញថោកៗ ផលិតនៅប្រទេសចិន ដែលគំរាមកំហែងដល់ក្រុមហ៊ុនផលិតនៅអឺរ៉ុប។ ទស្សនកិច្ចរបស់លោក Wang កើតមានឡើងតិចជាងពីរសប្តាហ៍ បន្ទាប់ពីបណ្តាមេដឹកនាំ EU ប្រគល់ភារកិច្ចឱ្យគណៈកម្មការអឺរ៉ុប ដោះស្រាយបញ្ហានេះ តាមរយៈការចរចាជាមួយទីក្រុងប៉េកាំង ខណៈកំពុងរៀបចំវិធានការការពារលើវិស័យសំខាន់ៗ។

គួរបញ្ជាក់ថា ឱនភាពពាណិជ្ជកម្ម EU លើទំនិញ បានឈានដល់តម្លៃប្រហែល ៣៦០ពាន់លានអឺរ៉ូ ឬ ៤១០ពាន់លានដុល្លារ ក្នុងឆ្នាំ២០២៥ មានន័យថា ប្លុកនេះបាននាំចូលទំនិញពីចិន ច្រើនជាងនាំចេញ៕