(ឌូបៃ)៖ ប្រភពដែលដឹងពីបញ្ហានេះបានប្រាប់ទីភ្នាក់ងារសារព័ត៌មាន Reuters នៅថ្ងៃចន្ទថា ក្រុមបច្ចេកទេសរបស់ប្រទេសអ៊ីរ៉ង់ និងសហរដ្ឋអាមេរិក ត្រូវបានរំពឹងថានឹងជួបពិភាក្សាគ្នានៅទីក្រុងដូហា (Doha) នាប៉ុន្មានថ្ងៃខាងមុខនេះ ដើម្បីអនុវត្តកិច្ចព្រមព្រៀងសន្តិភាពបណ្តោះអាសន្ន បន្ទាប់ពីការវាយប្រហារសងសឹកគ្នាកាលពីចុងសប្តាហ៍ បានគំរាមកំហែងដល់កិច្ចព្រមព្រៀងដ៏ផុយស្រួយនេះ។

ដើម្បីទប់ស្កាត់ការប៉ះទង្គិចគ្នា ក្រុមអ្នកសម្របសម្រួលបានរៀបចំបណ្តាញទំនាក់ទំនងពិសេស ដើម្បីបន្ធូរបន្ថយភាពតានតឹងរាល់ពេលមានឧប្បត្តិហេតុណាមួយកើតឡើង។ ប្រភពជាន់ខ្ពស់អ៊ីរ៉ង់បានបញ្ជាក់ថា ជំនួបនៅថ្ងៃអង្គារនេះ នឹងខុសពីការចរចាបច្ចេកទេសនៅប្រទេសស្វីសកន្លងមក ដោយលើកនេះនឹងផ្តោតសំខាន់លើការគ្រប់គ្រងច្រកសមុទ្រហ័រមូស​ និងការបន្ធូរបន្ថយភាពតានតឹង។

កាលពីថ្ងៃទី១៧ ខែមិថុនា អាមេរិក និងអ៊ីរ៉ង់ បានចុះហត្ថលេខាលើអនុស្សរណៈយោគយល់គ្នា ១៤ចំណុច ដើម្បីបញ្ចប់ជម្លោះដែលអូសបន្លាយ ៤ខែមកនេះ ដោយភាគីទាំងពីរយល់ព្រមបញ្ឈប់ការប្រយុទ្ធ និងបើកច្រកសមុទ្រហ័រមូសឡើងវិញ។ ការបិទច្រកសមុទ្រនេះ បានរុញច្រានតម្លៃប្រេងឱ្យហក់ឡើងដល់ជាង ១០០ដុល្លារក្នុងមួយធុង ដែលបង្កឱ្យមានអតិផរណាសកល និងផ្តល់សម្ពាធនយោបាយយ៉ាងខ្លាំងដល់ប្រធានាធិបតីអាមេរិក លោក ដូណាល់ ត្រាំ មុនការបោះឆ្នោតពាក់កណ្តាលអាណត្តិមកដល់។

កិច្ចព្រមព្រៀងនេះក៏បានបើកផ្លូវសម្រាប់ការចរចាស៊ីជម្រៅរយៈពេល ៦០ថ្ងៃ លើបញ្ហាស្មុគស្មាញដូចជាកម្មវិធីនុយក្លេអ៊ែររបស់អ៊ីរ៉ង់ ទោះបីជាភាគីទាំងពីរនៅតែមានការបកស្រាយផ្ទុយគ្នាជុំវិញលក្ខខណ្ឌក៏ដោយ។ ប្រធានាធិបតីអ៊ីរ៉ង់ លោក ម៉ាស៊ូដ ប៉េសេសគៀន (Masoud Pezeshkian) បានប្រកាសថា ទ្រព្យសម្បត្តិដែលជាប់បង្កកនៅកាតាចំនួន ៦ពាន់លានដុល្លារ (ក្នុងចំណោម ១២ពាន់លានដុល្លារ) នឹងត្រូវបញ្ចេញមកឱ្យអ៊ីរ៉ង់វិញ។ លោកបានចាត់ទុកអនុស្សរណៈដែលរួមបញ្ចូលទាំងការលើកលែងទណ្ឌកម្មប្រេងនេះ ថាជា «ជ័យជម្នះដ៏អស្ចារ្យសម្រាប់ប្រជាជនអ៊ីរ៉ង់»។

ស្របពេលជាមួយគ្នានេះ ប្រភពពីអ៊ីរ៉ង់បានបង្ហើបថា ទីក្រុងដូហា និងតេហេរ៉ង់កំពុងស្ថិតក្នុងដំណាក់កាលចុងក្រោយ នៃការឯកភាពលើនីតិវិធីបច្ចេកទេស ដើម្បីបញ្ចេញប្រាក់ ៦ពាន់លានដុល្លារដំបូង ដែលនឹងត្រូវធ្វើឡើងជាពីរដំណាក់កាល៕