(អង់ការ៉ា)៖ ប្រធានាធិបតីតួកគី លោក តៃយីប អេដូហ្គាន់ (Tayyip Erdogan) នៅថ្ងៃចន្ទ បានថ្លែងថា ប្រទេសតួកគីរំពឹងថាកិច្ចប្រជុំកំពូលរបស់អង្គការណាតូ (NATO) នៅក្នុងខែក្រោយនេះ នឹងផ្តោតសំខាន់លើសាមគ្គីភាពផ្ទៃក្នុង ខណៈលោកបានអំពាវនាវឱ្យមានការដកចេញនូវរាល់ការរឹតបន្តឹងលើការទិញលក់អាវុធ និងទាមទារឱ្យបញ្ចូលទីក្រុងអង់ការ៉ា (Ankara) ទៅក្នុងគម្រោងការពារសន្តិសុខអឺរ៉ុប។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ទីក្រុងអង់ការ៉ានឹងធ្វើជាម្ចាស់ផ្ទះរៀបចំកិច្ចប្រជុំមេដឹកនាំណាតូចំនួន ៣២ប្រទេស ចាប់ពីថ្ងៃទី០៧ ដល់ទី០៨ ខែកក្កដាខាងមុខ។ កិច្ចប្រជុំនេះធ្វើឡើងចំពេលដែលមានភាពតានតឹងផ្ទៃក្នុង ជុំវិញការបែងចែកថវិកាការពារជាតិ និងការរិះគន់របស់អាមេរិកចំពោះសម្ព័ន្ធមិត្តអឺរ៉ុបដែលមិនសូវជួយអាមេរិកក្នុងសង្គ្រាមនៅអ៊ីរ៉ង់។

ថ្លែងនៅក្នុងទីក្រុងអ៊ីស្តង់ប៊ុល (Istanbul) លោក អេដូហ្គាន់ បានគូសបញ្ជាក់ថា សម្ព័ន្ធមិត្តនឹងពិភាក្សាអំពីបញ្ហាសង្គ្រាមនៅអ៊ីរ៉ង់ អ៊ុយក្រែន និងហ្គាហ្សាផងដែរ។ ទន្ទឹមនឹងនេះ តួកគីក៏រំពឹងថាណាតូនឹងផ្តល់ការគាំទ្រដល់ខ្លួន ក្នុងការប្រយុទ្ធប្រឆាំងនឹងក្រុមឧទ្ទាមឃឺដ (PKK) ផងដែរ។ លោកបានសង្កត់ធ្ងន់ថា ដើម្បីទប់ទល់នឹងបញ្ហាប្រឈមរួម ណាតូត្រូវតែលុបចោលការរឹតបន្តឹងលើការទិញលក់អាវុធ និងត្រូវបែងចែកការទទួលខុសត្រូវឱ្យបានស្មើភាពគ្នា ដោយលោកអះអាងថាតួកគីយ៉េបានបំពេញកាតព្វកិច្ចចំណាយយោធារបស់ខ្លួនរួចរាល់ហើយ។

គួររំលឹកថា កន្លងមក តួកគីតែងតែត្អូញត្អែរអំពីការដែលអាមេរិក និងអឺរ៉ុប បានដាក់ទណ្ឌកម្មរារាំងការទិញលក់អាវុធរបស់ខ្លួន ដោយសារតែតួកគីមានគោលនយោបាយខុសប្លែកពីគេ និងមានទំនាក់ទំនងជិតស្និទ្ធជាមួយរុស្ស៊ី។ តួកគីចាត់ទុកទង្វើនេះថាជាការបំផ្លាញស្មារតីសាមគ្គីភាព និងរារាំងដល់ការអភិវឌ្ឍសមត្ថភាពការពារជាតិរបស់ប្លុកណាតូទាំងមូល៕