(ស៉ីដនី)៖ បុគ្គលិកម្នាក់ជាអ្នកបម្រើការងារនៅលើយន្ដហោះរបស់ក្រុមហ៊ុនអាកាសចរណ៍ Thai Airways ត្រូវបានឃាត់ខ្លួន និងជាប់សង្ស័យថាបានរត់ពន្ធគ្រឿងញៀនប្រភេទ heroin ជាង ១គីឡូក្រាម ចូលក្នុងប្រទេសអូស្ត្រាលី បន្ទាប់ពីមន្ត្រីគយបានរកឃើញគ្រឿងញៀនលាក់នៅក្នុងកាបូបយួរដៃ។ នេះបើតាមប៉ូលិសសហព័ន្ធអូស្ត្រាលី ដកស្រង់ចេញផ្សាយដោយទីភ្នាក់ងារសារព័ត៌មាន Reuters។

តាមប៉ូលិសអូស្រ្តាលី ស្ត្រីជាអ្នកបម្រើការនៅលើយន្ដហោះខាងលើមានអាយុ ២៦ឆ្នាំ និងជាបុគ្គលិកកំពុងបម្រើការនៅលើជើងហោះហើររបស់ក្រុមហ៊ុន Thai Airways នៅពេលរូបនាងធ្វើដំណើរទៅដល់អាកាយានដ្ឋានទីក្រុង Melbourne កាលពីថ្ងៃទី២៥ ខែមិថុនា ឆ្នាំ២០២៦។ មន្ត្រីគយអូស្ត្រាលីបានធ្វើការត្រួតពិនិត្យលើកាបូបយួរដៃចំនួន១២ របស់ស្ត្រី រូបនោះដោយរកឃើញថាមានលាក់គ្រឿងញៀនប្រភេទ heroin ជាង១គីឡូក្រាម មានតម្លៃប្រហែល ៣៤៣ ៣០០ដុល្លារ។

គួរបញ្ជាក់ថា ស្ត្រីខាងលើកំពុងប្រឈមនឹងការចោទប្រកាន់ពីបទនាំចូល និងកាន់កាប់គ្រឿងញៀនខុសច្បាប់ ហើយដែលបទចោទនីមួយៗមានទោសជាប់ពន្ធនាគារ ២៥ឆ្នាំ ប្រសិនបើ តុលាការរកឃើញថាពិតជាពិរុទ្ធភាពដូចការចោទប្រកាន់មែននោះ។ ស្ត្រីរូបកំពុងបន្តជាប់ឃុំ ហើយអាចនឹងត្រូវបង្ហាញខ្លួននៅក្នុងតុលាការនៃទីក្រុង Melbourne នៅថ្ងៃទី១៤ ខែកញ្ញាខាងមុខ៕