(ការ៉ាកាស)៖ មេដឹកនាំបក្សប្រឆាំងវ៉េណេស៊ុយអេឡា និងជាម្ចាស់ពានរង្វាន់ណូបែលសន្តិភាព លោកស្រី Maria Corina Machado កាលពីថ្ងៃចន្ទ ទី២៩ ខែមិថុនា ឆ្នាំ២០២៦ បានចោទប្រកាន់រដ្ឋាភិបាលវ៉េណេស៊ុយអេឡា ថាបាននិងកំពុងរារាំងដំណើរ​វិលត្រឡប់ចូលប្រទេសវិញរបស់លោកស្រី ស្របពេលដែលប្រទេសអាមេរិកឡាទីនមួយនេះ ទើបតែបានទទួលរងការវាយប្រហារ​យ៉ាងធ្ងន់ធ្ងរពីគ្រោះរញ្ជួយដីកាលពីសប្តាហ៍មុន សម្លាប់មនុស្សកើនលើស១៧០០នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោកស្រី Machado បានស្ថិតនៅក្រៅប្រទេស ចាប់តាំងពីខែធ្នូ ឆ្នាំ២០២៥ នៅពេលលោកស្រីបានលួចចាកចេញពីវ៉េណេស៊ុយអេឡា ក្រោយសំងំលាក់ខ្លួនជាយូរមកហើយ ដើម្បីទៅទទួលពានរង្វាន់ណូបែល នៅទីក្រុងអូស្លូនៃប្រទេសន័រវែស។

ក្នុងសារបង្ហោះលើបណ្តាញសង្គម លោកស្រី Machado បាននិយាយថា លោកស្រីចង់ត្រឡប់ទៅរួមសុខទុក្ខជាមួយប្រជាជនវ៉េណេស៊ុយអេឡា អំឡុងពេលវេលាដ៏លំបាកនេះ ប៉ុន្តែរដ្ឋាភិបាលវ៉េណេស៊ុយអេឡា បានរារាំងការវិលត្រឡប់របស់លោកស្រី តាមរយៈការបិទដែនអាកាសសម្រាប់យន្តហោះពាណិជ្ជកម្ម។

អាកាសយានដ្ឋានអន្តរជាតិនៅទីក្រុង Maiquetia ដែលបម្រើរដ្ឋធានីការ៉ាកាស ត្រូវបានបិទទ្វារភ្លាមៗ ដោយសារគ្រោះរញ្ជួយដី។ ក្រោយមក វាត្រូវបានបើកសម្រាប់តែជើងហោះហើរមនុស្សធម៌ប៉ុណ្ណោះ។ ប៉ុន្តែអាកាសយានដ្ឋាននៅទីក្រុងដទៃទៀតដូចជា Valencia ភាគកណ្តាល និង Maracaibo ភាគខាងកើត កំពុងធ្វើប្រតិបត្តិការជើងហោះហើរអន្តរជាតិជាធម្មតា។

បច្ចុប្បន្ន លោកស្រី Delcy Rodriguez គឺជាប្រធានាធិបតីស្តីទីវ៉េណេស៊ុយអេឡា ដែលកំពុងដឹកនាំប្រទេស ក្រោមសម្ពាធរបស់ទីក្រុងវ៉ាស៉ីនតោន ចាប់តាំងពីប្រធានាធិបតី លោក Nicolas Maduro ត្រូវបានយោធាអាមេរិកចាប់ខ្លួន កាលពីខែមករាដើមឆ្នាំនេះ។ កាលពីខែឧសភា លោកស្រី Machado បានប្រកាសចេញពីប្រទេសប៉ាណាម៉ា អំពីការប្តេជ្ញារបស់លោកស្រី ដើម្បីចរចាការធ្វើអន្តរកាលប្រជាធិបតេយ្យ ជាមួយរដ្ឋាភិបាលស្តីទីវ៉េណេស៊ុយអេឡា ប៉ុន្តែរដ្ឋបាលលោកស្រី Rodriquez មិនបានឆ្លើយតបការទាមទាររបស់លោកស្រី Machado នោះទេ៕