(សិង្ហបុរី)៖ នៅថ្ងៃអង្គារ ទី៣០​ ខែមិថុនា ឆ្នាំ២០២៦ អាជ្ញាធរទីផ្សារថាមពលរបស់ប្រទេសសិង្ហបុរី EMA បានប្រកាសថា ផ្ទះសម្បែងនៅបុរីរដ្ឋមួយនេះ នឹងត្រូវបង់ថ្លៃពន្ធអគ្គិសនី ព្រមទាំងឧស្ម័នខ្ពស់ជាងមុន សម្រាប់ត្រីមាសទី៣នៃឆ្នាំ២០២៦ ក្រោយមានការឡើងថ្លៃនៃតម្លៃឧស្ម័នធម្មជាតិ ជំរុញដោយវិបត្តិជម្លោះនៅមជ្ឈិមបូព៌ា។ នេះបើតាមការចេញផ្សាយដោយ ទីភ្នាក់ងារព័ត៌មាន CNA។

ចាប់ពីខែកក្កដា ដល់ខែកញ្ញា ថ្លៃពន្ធអគ្គិសនីនៅសិង្ហបុរីនឹងត្រូវដំឡើង៤,៦៤សេន ក្នុងមួយគីឡូវ៉ាត់ម៉ោង ខ្ពស់ជាងតម្លៃកាលពីក្នុងត្រីមាសទី២ មុនគិតថ្លៃពន្ធលើទំនិញនិងសេវាកម្ម។ ហេតុដូចនេះ តម្លៃអគ្គិសនីឥឡូវនឹងថ្លៃ ៣១,៩១សេនក្នុងមួយគីឡូវ៉ាត់ម៉ោង សម្រាប់ត្រីមាសទី៣។ ធៀបជាមួយនឹងត្រីមាសមុន តម្លៃអគ្គិសនីសម្រាប់ផ្ទះសម្បែង នឹងកើនជាមធ្យមប្រហែល១៧ភាគរយ ខណៈតម្លៃហ្គាស នឹងឡើងជាមធ្យមខ្ទង់៧,១ភាគរយ ពី២១,៩២សេនក្នុងមួយគីឡូវ៉ាត់ម៉ោង កាលពីត្រីមាស២ ដល់២៣,៤៨សេនក្នុងមួយគីឡូវ៉ាត់ម៉ោង សម្រាប់ត្រីមាសទី៣។

EMA បានគូសបញ្ជាក់ថា ស្ថានការណ៍នៅមជ្ឈិមបូព៌ា កំពុងតែបន្តមានភាពមិនប្រាកដប្រជា ប៉ុន្តែប្រសិនបើវាប្រសើរឡើងនោះ ការធ្លាក់ចុះតម្លៃឥន្ធនៈ អាចនាំឱ្យថ្លៃពន្ធអគ្គិសនីនិងឧស្ម័នធ្លាក់ចុះទៅវិញ នៅត្រីមាសទី៤ នៃឆ្នាំ២០២៦៕