(រ៉ូម)៖ គិតត្រឹមថ្ងៃចន្ទសប្តាហ៍នេះ អ៉ីតាលី និងប្រទេសក្នុងតំបន់បាល់កង់ បានរងឥទ្ធិពលនៃរលកកម្តៅ ដែលបានបង្កឱ្យមានមនុស្សស្លាប់ និងរំខានដល់ជីវភាពប្រចាំថ្ងៃនៅទូទាំងអឺរ៉ុបរួចហើយ ក្នុងរយៈពេលជាង ១សប្តាហ៍មកនេះ ជាមួយការកើនឡើងនូវក្តីបារម្ភអំពីភ្លើងឆេះព្រៃរាលដាល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី៣០ ខែមិថុនា ឆ្នាំ២០២៦។

ដោយឡែកនៅត្រើយម្ខាងទៀតនៃមហាសមុទ្រ Atlantic ទីភ្នាក់ងារឧតុនិយមអាមេរិក បានព្រមានអំពីរលកកម្តៅដ៏គ្រោះថ្នាក់ ជាមួយសីតុណ្ហភាព រង្វង់ជាង ៣០អង្សាសេ នៅផ្នែកជាច្រើននៃភាគកណ្តាល និងភាគខាងកើតសហរដ្ឋអាមេរិក មុនការប្រារព្ធខួបឯករាជ្យលើកទី២៥០ ចំថ្ងៃសៅរ៍ ទី៤ ខែកក្កដា។

សម្រាប់​អឺរ៉ុប​ប៉ែកខាង​លិចវិញ សីតុណ្ហភាព​ដែល​ធ្លាក់​ចុះ​ពី​កម្រិត​ខ្ពស់​ក្នុង​ខែ​មិថុនា ក៏​ទំនង​ជា​កើន​ឡើងវិញ​​នៅ​សប្ដាហ៍​ក្រោយ។ ក្នុងប្រទេសអ៉ីតាលី ទីក្រុងចំនួន ២២ ចាប់ពី Bolzano នៅភាគខាងជើងដល់ Palermo លើកោះភាគខាងត្បូងនៃតំបន់ Sicily ស្ថិតក្រោមការព្រមានពីរលកកម្តៅកម្រិតពណ៌ក្រហម កាលពីថ្ងៃចន្ទ។

នៅប្រទេសក្រូអាស៉ី ទីភ្នាក់ងារឧតុនិយម បានចេញការប្រកាសអាសន្នកម្រិតពណ៌ក្រហម សម្រាប់តំបន់នានា រួមទាំងរដ្ឋធានី Zagreb និងគោលដៅទេសចរណ៍ឆ្នេរ Split និង Dubrovnik។ ក្រុមអ្នកពន្លត់អគ្គីភ័យ ជំនួយដោយយន្តហោះ ៤គ្រឿង បានប្រយុទ្ធនឹងភ្លើងឆេះព្រៃនៅលើកោះទេសចរណ៍ Vis ក្នុងសមុទ្រ Adriatic ចម្ងាយប្រហែល ៥៥គីឡូម៉ែត្រ ភាគនិរតីនៃតំបន់ឆ្នេរ Split។

ដោយឡែក ប្រទេសអាល់បានី មានភ្លើងឆេះព្រៃដែលបានលេបត្របាក់ព្រៃ និងដើមអូលីវជាច្រើនហិកតា កាលពីចុងសប្តាហ៍មុន។ រលកកម្ដៅតាំងពីថ្ងៃទី២០ ខែមិថុនា បានបំបែកកំណត់ត្រាដើមរដូវក្តៅ ហើយលក្ខខណ្ឌកម្ដៅខ្លាំង បានរំខានដល់ការផលិតថាមពល បំផ្លាញហេដ្ឋារចនាសម្ព័ន្ធ និងប្រព័ន្ធសុខាភិបាល៕