(អាថែន)៖ កងពន្លត់អគ្គិភ័យក្រិកបានឱ្យដឹងនៅថ្ងៃអង្គារថា ក្រុមជួយសង្គ្រោះកំពុងស្វែងរកជនរងគ្រោះដែលអាចជាប់នៅក្រោមគំនរបាក់បែក បន្ទាប់ពីអគារស្នាក់នៅកម្ពស់ ៤ជាន់មួយកន្លែង បានបាក់ស្រុតនៅក្នុងតំបន់ប៉េត្រាឡូណា (Petralona) នៃរដ្ឋធានីអាថែន (Athens)។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

អាជ្ញាធរបានបញ្ជាក់ថា មនុស្សចំនួន ៤នាក់ ដែលត្រូវបានរាយការណ៍ថាបានជាប់គាំងពីមុនមក ត្រូវបានរកឃើញ និងមានសុវត្ថិភាពហើយ ប៉ុន្តែប្រតិបត្តិការរុករកនៅតែបន្តធ្វើឡើងយ៉ាងសកម្ម។ ក្រុមការងារដោយមានជំនួយពីឆ្កែហិតក្លិន បាននិងកំពុងរុករកយ៉ាងហ្មត់ចត់តាមគំនរបាក់បែក ខណៈដែលកម្លាំងសង្គ្រោះផ្សេងទៀតកំពុងត្រៀមខ្លួនអន្តរាគមន៍ជាប្រចាំ។

រហូតមកដល់ពេលនេះ គេមិនទាន់ដឹងច្បាស់ពីមូលហេតុពិតប្រាកដ ដែលបណ្តាលឱ្យអគារដែលមានផ្ទះល្វែងចំនួន ៧ បន្ទប់នេះបាក់ស្រុតនៅឡើយទេ ប៉ុន្តែកងពន្លត់អគ្គិភ័យបានកត់សម្គាល់ថា មានការដ្ឋានសំណង់មួយកំពុងដំណើរការសាងសង់នៅជាប់នឹងអគារនេះផ្ទាល់ ដែលអាចជាមូលហេតុពាក់ព័ន្ធនឹងហេតុការណ៍នេះ៕