(ណៃពិដោ)៖ អង្គការឃ្លាំមើលជម្លោះ ACLED ដែលមានមូលដ្ឋាននៅសហរដ្ឋអាមេរិក នាថ្ងៃពុធ ទី១ ខែកក្កដា ឆ្នាំ២០២៦ បានអះអាងថា មនុស្សសរុបលើស ១០០ ០០០នាក់ ត្រូវបានសម្លាប់នៅក្នុងប្រទេសមីយ៉ាន់ម៉ា គិតចាប់តាំងពីរដ្ឋប្រហារយោធា កាលពី៥ឆ្នាំមុន ដែលបានបង្កជាសង្រ្គាមស៉ីវិល។ នេះបើតាមការចេញផ្សាយដោយ ទីភ្នាក់ងារព័ត៌មាន ​AFP

អង្គការ ACLED បាននិយាយថា ចាប់តាំងពីរដ្ឋប្រហារយោធាខែកុម្ភៈ ឆ្នាំ២០២១ មានករណីមនុស្សដែលត្រូវបានសម្លាប់ពាក់ព័ន្ធ​ទៅនឹងជម្លោះចំនួន១០០ ១១៤នាក់។ ជម្លោះនៅមីយ៉ាន់ម៉ា គឺមិនមានតួលេខអ្នកស្លាប់ឬរបួសផ្លូវការនោះឡើយ ហើយតួលេខប៉ាន់ប្រមាណ គឺមានភាពខុសគ្នាយ៉ាងទូលំទូលាយ ប៉ុន្តែក្រុមអ្នកវិភាគជាទូទៅ ចាត់ទុកសង្រ្គាមស៉ីវិលដែលបានអូសបន្លាយកន្លះទសវត្សរ៍នេះ ជាជម្លោះដ៏ប្រល័យបំផុតដែលកំពុងបន្តនៅតំបន់អាស៉ី។

គួរបញ្ជាក់ថា យោធាបានផ្តួលរំលំរដ្ឋាភិបាលជាប់ឆ្នោតស្របច្បាប់របស់លោកស្រី អោងសាន ស៊ូជី កាលពីខែកុម្ភៈ ឆ្នាំ២០២១ ហើយចាប់ឃុំខ្លួនលោកស្រី នាំឱ្យការធ្វើតេស្តលទ្ធិប្រជាធិបតេយ្យ ដែលមានរយៈពេលមួយទសវត្សរ៍របស់ប្រទេសមីយ៉ាន់ម៉ា បិទបញ្ចប់ទៅវិញ។ កាលពីប៉ុន្មានខែមុននេះ អតីតប្រមុខរបបយោធា លោក Min Aung Hlaing បានឡើងកាន់តំណែងជា​ប្រធានាធិបតីស៉ីវិល ក្រោយការបោះឆ្នោតសកលមួយ ដែលទទួលរងការរិះគន់ពីអន្តរជាតិថា ខ្វះតម្លាភាពគ្រប់គ្រាន់៕