(ព្រុចសែល)៖ សហភាពអឺរ៉ុប (EU) នៅថ្ងៃពុធ ទី១ ខែកក្កដា ឆ្នាំ២០២៦ បានដាក់ចេញនូវវិធានការដំបូងឆ្ពោះទៅរក​ការទប់ស្កាត់នូវ​អ្វីដែលខ្លួន ចាត់ទុកថាជាការប្រកួតប្រជែង​មិនស្មើភាពពី App លក់ទំនិញ​អនឡាញដូចជា Shein, Temu និង AliExpress ដោយយកថ្លៃសេវា ៣អឺរ៉ូ ឬ ៣,៤២ដុល្លារអាមេរិក ​លើការនាំទំនិញតម្លៃទាបមកពីប្រទេសចិន ដែលពីមុនត្រូវបាននាំចូលក្នុង​ប្លុក​ដោយមិនគិតពន្ធ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

នេះគឺជាឧបសគ្គមួយសម្រាប់ App ទំនិញលក់រាយតាមអនឡាញ ដែលបានប្រើប្រាស់ការលើកលែងពន្ធគយ ដើម្បីលក់ទំនិញក្នុងតម្លៃទាបបំផុត និងដែលបានជំរុញការលក់យ៉ាងខ្លាំង ប៉ុន្តែធ្វើឱ្យអ្នកលក់រាយដោយផ្ទាល់ និងអ្នកធ្វើគោលនយោបាយ មានការត្អូញត្អែរ។ ថ្លៃសេវាដែលចូលជាធរមាននាថ្ងៃពុធនេះ ត្រូវគិតថ្លៃសម្រាប់ការចាត់ថ្នាក់គយនីមួយៗ នៅក្នុងការដឹកជញ្ជូន។ កញ្ចប់មួយដែលមានរបស់របរ ៣ប្រភេទផ្សេងគ្នា នឹងត្រូវគិតថ្លៃសរុបចំនួន ៩អឺរ៉ូ ខណៈដែលកញ្ចប់ដែលមានរ៉ូបច្រើន ឬប្រដាប់ក្មេងលេងច្រើននឹងត្រូវគិតថ្លៃ ៣អឺរ៉ូ។

គួរបញ្ជាក់ថា សហរដ្ឋអាមេរិក ដែលជាទីផ្សារធំបំផុតរបស់ App លក់ទំនិញខាងលើនេះ ក៏បានបញ្ចប់ការលើកលែង «de minimis» សម្រាប់ការនាំចូលពីប្រទេសចិនផងដែរកាលពីខែឧសភា និងសម្រាប់ការនាំចូលទាំងអស់នៅចុងខែសីហាខាងមុខ៕