(ឡាហ័រ)៖ កុមារចំនួន ១៤នាក់បានបាត់បង់ជីវិត បន្ទាប់ពីដំបូលនៃមជ្ឈមណ្ឌលបង្រៀនគួរឯកជនមួយកន្លែង បានបាក់ស្រុត នៅក្នុងទីក្រុងឡាហ័រ (Lahore) ភាគខាងកើតប្រទេសប៉ាគីស្ថាន កាលពីថ្ងៃអង្គារ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ភ្នាក់ងារសង្គ្រោះបន្ទាន់បានបញ្ជាក់ថា កុមារដែលស្លាប់មានអាយុចន្លោះពី ៥ ទៅ ១៦ឆ្នាំ ភាគច្រើនក្រោមអាយុ ៩ឆ្នាំ រួមជាមួយគ្រូបង្រៀនម្នាក់អាយុ ៣០ឆ្នាំ ដែលត្រូវបានរកឃើញនៅក្រោមគំនរបាក់បែក។ រដ្ឋមន្ត្រីព័ត៌មានខេត្តពុនចាប (Punjab) បានឱ្យដឹងថា តាមរបាយការណ៍បឋម ទីតាំងបង្រៀននេះមិនបានចុះបញ្ជីត្រឹមត្រូវទេ ហើយបានដំណើរការនៅក្នុងអគារដែលមានដំបូលចាស់ទ្រុឌទ្រោម។ លោកស្រីព្រមានថា ប្រសិនបើរកឃើញមានការធ្វេសប្រហែស អ្នកទទួលខុសត្រូវនឹងត្រូវប្រឈមមុខនឹងច្បាប់យ៉ាងតឹងរ៉ឹងបំផុត។

ដើម្បីទប់ស្កាត់ហេតុការណ៍បែបនេះ អាជ្ញាធរខេត្តបានបញ្ជាឱ្យចុះត្រួតពិនិត្យរាល់អគារដែលមិនមានសុវត្ថិភាព មុនរដូវវស្សាមកដល់ និងរឹតបន្តឹងច្បាប់លើសាលាឯកជនដែលមិនបានចុះបញ្ជី។ ទន្ទឹមនឹងនេះ ប្រធានាធិបតីប៉ាគីស្ថាន លោក អាស៊ីហ្វ អាលី ហ្សាដារី (Asif Ali Zardari) បានសម្តែងក្តីសោកសង្រេងយ៉ាងក្រៀមក្រំ និងអំពាវនាវឱ្យពង្រឹងវិធានការសុវត្ថិភាពជាបន្ទាន់៕