(វ៉ាស៊ីនតោន)៖ ការសិក្សាមួយចេញផ្សាយដោយមជ្ឈមណ្ឌលសម្រាប់យុទ្ធសាស្ត្រ និងការសិក្សាអន្តរជាតិ (CSIS) មានមូលដ្ឋាននៅសហរដ្ឋអាមេរិក បានឱ្យដឹងថាសង្រ្គាមរបស់រុស្ស៉ីប្រឆាំងនឹងអ៊ុយក្រែន បានបង្កឱ្យទាហានភាគីទាំងសងខាងស្លាប់ របួស និងបាត់ខ្លួនលើស ២លាននាក់ ហើយក្នុងនោះរុស្ស៉ីបាត់បង់ចំនួនកងទ័ពច្រើនជាងគេ។ នេះបើតាមការដកស្រង់ចេញផ្សាយដោយទីភ្នាក់ងារសារព័ត៌មាន AFP។

តាម CSIS ចំនួនអ្នកស្លាប់ រងរបួស និងបាត់ខ្លួននៅក្នុងចំណោមទាហានរុស្ស៉ី និងអ៊ុយក្រែនច្របាច់បញ្ចូលគ្នា មានលើស ២លាននាក់។ CSIS ក្នុងការសិក្សារបស់ខ្លួន បានវាយតម្លៃថាទាហានរុស្ស៉ី ចន្លោះពី ៤០០ ០០០នាក់ ដល់ ៤៥០ ០០០នាក់ត្រូវបានសម្លាប់ ចាប់តាំងពីរុស្ស៉ីបើកធ្វើសង្រ្គាមប្រឆាំងអ៊ុយក្រែនក្នុងខែកុម្ភៈ ឆ្នាំ២០២២ ហើយគិតជាសរុបទាំងអ្នកស្លាប់ រងរបួស និងបាត់ខ្លួន ក្នុងចំណោមទាហានរុស្ស៉ីមានដល់ទៅ ១,៤លាននាក់។

CSIS បានឱ្យដឹងទៀតថាព្រមពេលជាមួយគ្នា ទាហានអ៊ុយក្រែនចន្លោះពី ៥២៥ ០០០នាក់ ដល់ ៦២៥ ០០០នាក់បានស្លាប់ រងរបួស និងបាត់ខ្លួន ហើយចន្លោះពី ១២៥ ០០០នាក់ ដល់ ១៥០ ០០០នាក់ ត្រូវបានសម្លាប់ក្នុងរយៈពេលដូចគ្នា។

គួរបញ្ជាក់ថា បើតាម CSIS ទាហានរុស្ស៉ីស្លាប់ក្នុងសង្រ្គាមនៅអ៊ុយក្រែន មានចំនួនច្រើនជាង៤ដង បើធៀ​បទៅនឹងទាហានអាមេរិកដែលបានស្លាប់នៅក្នុងសង្រ្គាមទាំងអស់ដែលសហរដ្ឋអាមេរិក បានប្រឡូកចាប់តាំងពីសង្រ្គាមលោកលើកទី២មក៕