(ដូហា)៖ អ៉ីរ៉ង់ និងសហរដ្ឋអាមេរិកបានបិទបញ្ចប់កិច្ចចរចាដោយប្រយោលជុំថ្មីមួយទៀត កាលពីថ្ងៃពុធ ទី១ ខែកក្កដា ឆ្នាំ២០២៦ ដោយមិនមានសញ្ញាថាពួកគេបានបោះជំហានឆ្ពោះទៅរកសន្តិភាពយូរអង្វែងមួយនោះទេ ហើយផ្ទុយទៅវិញកិច្ចចរចាបានផ្តោតលើបញ្ហាដែលភាគីទាំងសងខាងបានអះអាងថាត្រូវបានដោះស្រាយរួចហើយ នៅពេលកិច្ចព្រមព្រៀងបឋមមួយត្រូវបានចុះហត្ថលេខាកាលពីជាង ២សប្ដាហ៍មុន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

Reuters ដោយផ្អែកលើប្រភពដឹងពីចរចាដោយប្រយោលរវាងសហរដ្ឋអាមេរិក និងអ៉ីរ៉ង់ក្នុងទីក្រុងដូហា ប្រទេសកាតា បានឱ្យដឹងថាក្រុមអ្នកចរចាបានចំណាយពេល ២ថ្ងៃ ក្នុងទីក្រុងដូហា ដើម្បីពិភាក្សាពីការធ្វើចរាចរឆ្លងកាត់ច្រកសមុទ្រ Hormuz និងការបញ្ចេញទ្រព្យសម្បត្តិរបស់អ៉ីរ៉ងដែលត្រូវបានបង្កក ជាលក្ខខណ្ឌសំខាន់ចំនួន២ នៃកិច្ចព្រមព្រៀងបឋម។

បើតាមក្រសួងការបរទេសកាតា កិច្ចចរចាជំបន្ទាប់នឹងត្រូវធ្វើឡើង បន្ទាប់ពីការរៀបចំពិធីបុណ្យសពរបស់អតីតមេដឹកនាំកំពូលអ៉ីរ៉ង់ លោក Ayatollah Ali Khamenei ដែលត្រូវបានរំពឹងថានឹងត្រូវបញ្ចុះសពនៅថ្ងៃទី៩ ខែកក្កដានេះ។ នៅឯទីក្រុងវ៉ាស៊ីនតោនវិញ លោកប្រធានាធិបតីអាមេរិក ដូណាល់ ត្រាំ បាននិយាយថាភាគីទាំងសងខាងបានបង្កើត ភាពរីកចម្រើនស្ដីពីការដាក់កំហិតលើកម្មវិធីនុយក្លេអ៊ែរអ៉ីរ៉ង់។ ប៉ុន្តែប្រភពដែលប្រាប់ Reuters បានអះអាងថាកម្មវិធីនុយក្លេអ៊ែរអ៉ីរ៉ង់មិនត្រូវបានលើកឡើងក្នុងកិច្ចចរចានោះទេ៕