(ម៉ុងតេវីដេអូ)៖ កាលពីថ្ងៃពុធ ទី១ ខែកក្កដា ឆ្នាំ២០២៦ ប្រធានាធិបតីនៃប្រទេសស៉ីលីនិងអ៊ុយរូហ្កាយ បានជួបគ្នាពិភាក្សា​អំពី មធ្យោបាយដើម្បីបង្រ្កាបឧក្រិដ្ឋកម្មជាបណ្តាញ ខណៈវាជាបញ្ហាដែលក្រុមអ្នកនយោបាយស្តាំនិយម បាននាំគ្នាសន្យាដោះស្រាយ អំឡុងយុទ្ធនាការឃោសនាបោះឆ្នោត ហើយបានជួយឱ្យពួកគេឈ្នះអំណាចជាបន្តបន្ទាប់ នៅពាសពេញតំបន់អាមេរិកឡាទីន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ប្រធានាធិបតីស៉ីលី លោក Jose Antonio Kast និងប្រធានាធិបតីអ៊ុយរូហ្កាយ លោក Yamandu Orsi បានជួបជជែកគ្នា​មួយថ្ងៃក្រោយចូលរួមកិច្ចប្រជុំប្លុកពាណិជ្ជកម្មប្រចាំតំបន់ ដែលហៅថា Mercosur នៅឯប្រទេសប៉ារ៉ាហ្កាយ។ លោក Kast បានបង្ហាញក្តីសង្ឃឹមថា អ៊ុយរូហ្កាយនិងប៉ារ៉ាហ្កាយ នឹងអាចចូលរួមឆាប់ៗជាមួយស៉ីលី ក្នុងការចុះកិច្ចព្រមព្រៀងប្រយុទ្ធប្រឆាំង​ឧក្រិដ្ឋកម្ម ដើម្បីបង្រ្កាបបណ្តាញក្រុមឧក្រិដ្ឋជនជួញដូរគ្រឿង ដែលមានឥទ្ធិពលធំ និងដែលបានបញ្ជូនគ្រឿងញៀនប្រភេទកូកាអ៉ីន ក្នុងបរិមាណយ៉ាងច្រើនចេញពីតំបន់អាមេរិកខាងត្បូង ចូលទៅកាន់សហរដ្ឋអាមេរិកនិងអឺរ៉ុប។

ក្នុងសេចក្តីថ្លែងការណ៍រួម ជាមួយលោក Orsi លោក Kast បាននិយាយថា «ឧក្រិដ្ឋកម្មជាបណ្តាញ អាចបោសសម្អាតចេញ​ពីប្រទេសមួយបាន ប៉ុន្តែត្រូវការឱ្យមានគោលការណ៍ដូចគ្នា នៅក្នុងប្រទេសទាំងអស់ ដើម្បីអាចលុបបំបាត់វាចោលទាំងស្រុង»។

ដោយមានការគាំទ្រពីប្រធានាធិបតីអាមេរិក លោក ដូណាល់ ត្រាំ លោក Kast ទទួលបានជ័យជម្នះភ្លូកទឹកភ្លូកដី នៅប្រទេសស៉ីលី កាលពីខែធ្នូ ឆ្នាំ២០២៥ ជាមួយការសន្យាថា នឹងបង្ក្រាបយ៉ាងម៉ឺងម៉ាត់ ចំពោះឧក្រិដ្ឋកម្មក៏ដូចជាអន្តោប្រវេសន៍ខុសច្បាប់ ដែលលោកបន្ទោសថា បាននាំយកក្រុមឧក្រិដ្ឋជនគ្រឿងញៀន និងក្រុមជនអន្ធពាល ចូលមកក្នុងស៉ីលី ដែលជាប្រទេសមានភាពរីកចម្រើនខ្លាំងមួយ នៅអាមេរិកឡាទីន។

គួរបញ្ជាក់ថា អត្រាឃាតកម្មនៅស៉ីលី បានកើនឡើងទ្វេដង អំឡុងពេលមួយទសវត្សរ៍ចុងក្រោយនេះ គឺកើនដល់៥,៤ ក្នុងចំណោមប្រជាជន១០០,០០០នាក់ ខណៈនៅអ៊ុយរូហ្កាយ អត្រានេះគឺលើសអត្រានៅស៉ីលីស្ទើគុណនឹងពីរ៕