(ប៉េកាំង)៖ ក្រសួងការបរទេសនៃប្រទេសចិន នៅថ្ងៃព្រហស្បតិ៍ ទី២ ខែកក្កដា ឆ្នាំ២០២៦ បានប្រកាសឱ្យដឹងថា សមាជិកសភាជាន់ខ្ពស់ លោក He Wei នឹងធ្វើដំណើរទៅចូលរួមពិធីបុណ្យសព របស់អតីតមេដឹកនាំកំពូលនៃប្រទេសអ៉ីរ៉ង់ លោក Ayatollah Ali Khamenei នៅឯទីក្រុងតេហេរ៉ង់។ នេះបើតាមការចេញផ្សាយដោយទីភ្នាក់ងារព័ត៌មាន Reuters។

អ្នកនាំពាក្យក្រសួងការបរទេសចិន បាននិយាយថា កម្មវិធីដែលលោកនឹងត្រូវចូលរួម គឺនៅថ្ងៃទី៣ ខែកក្កដា។ លោក He មានមុខតំណែងជា អនុប្រធាននៃស្ថាប័នតាក់តែងច្បាប់កំពូលរបស់ចិន គឺគណៈកម្មាធិការអចិន្រ្តៃយ៍នៃសភាប្រជាជនចិន។

លោក Khamenei ត្រូវបានសម្លាប់ កាលពីថ្ងៃដំបូងនៃសង្រ្គាមរបស់អាមេរិកនិងអ៉ីស្រាអែល ប្រឆាំងលើប្រទេសអ៉ីរ៉ង់ ដែលផ្ទុះឡើងកាលពីថ្ងៃទី២៨ ខែកុម្ភៈ។ យោងតាមប្រព័ន្ធផ្សព្វផ្សាយរដ្ឋអ៉ីរ៉ង់ ពិធីបុណ្យថ្នាក់ជាតិរបស់លោក នឹងចាប់ផ្តើមជាផ្លូវការ នៅរដ្ឋធានីតេហេរ៉ង់នាថ្ងៃទី៤ ខែកក្កដា ហើយបិទបញ្ចប់ជាមួយការបញ្ចុះសព នៅឯស្រុកកំណើតរបស់លោក គឺនៅទីក្រុង Mashhad ភាគឦសានប្រទេស នាថ្ងៃទី៩ ខែកក្កដា។

គួរបញ្ជាក់ថា អ៉ីរ៉ង់និងសហរដ្ឋអាមេរិក ទើបតែបានបិទបញ្ចប់កិច្ចចរចាដោយប្រយោលជុំថ្មីមួយទៀត កាលពីថ្ងៃពុធសប្តាហ៍នេះ ខណៈក្រសួងការបរទេសកាតា ដែលជាអ្នកកំពុងជួយសម្រុះសម្រួលជម្លោះ បានប្រាប់ថា កិច្ចចរចាជុំបន្ទាប់នឹងត្រូវធ្វើឡើង បន្ទាប់ពីការរៀបចំពិធីបុណ្យសពរបស់លោក Khamenei៕