(ឌូបៃ)៖ មេបញ្ជាការយោធាអ៊ីរ៉ង់នៅថ្ងៃព្រហស្បតិ៍ បានព្រមានសហរដ្ឋអាមេរិក និងអ៊ីស្រាអែល កុំឱ្យបើកការវាយប្រហារណាមួយមកលើប្រទេសអ៊ីរ៉ង់ ខណៈដែលខ្លួនកំពុងរៀបចំពិធីបុណ្យសពថ្នាក់ជាតិសម្រាប់អតីតមេដឹកនាំកំពូល លោក អាលី ខាមេណៃ (Ali Khamenei) ដែលត្រូវបានសម្លាប់ក្នុងការវាយប្រហារតាមអាកាសកាលពីថ្ងៃដំបូងនៃសង្គ្រាម។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក អាលី អាប់ដុលឡាហ៊ី (Ali Abdollahi) មេបញ្ជាការនៃទីបញ្ជាការកណ្តាល Khatam al-Anbiya បានសង្កត់ធ្ងន់តាមរយៈប្រព័ន្ធផ្សព្វផ្សាយរដ្ឋថា «យើងសូមព្រមានសត្រូវរបស់អ៊ីរ៉ង់ ជាពិសេសសហរដ្ឋអាមេរិក និងរបបស៊ីយ៉ូនីស (អ៊ីស្រាអែល) ឱ្យជៀសវាងការគណនាខុស និងត្រូវគិតពីការវាយបកសងសឹកយ៉ាងចាស់ដៃពីកងកម្លាំងប្រដាប់អាវុធរបស់យើង ចំពោះរាល់ការគំរាមកំហែ

ង និងការឈ្លានពាន»។

គួរបញ្ជាក់ថា ពិធីដង្ហែសពលោក អាលី ខាមេណៃ នឹងចាប់ផ្តើមនៅថ្ងៃទី០៤ ខែកក្កដា ក្នុងរដ្ឋធានីតេហេរ៉ង់ និងបញ្ចប់នៅថ្ងៃទី០៩ ខែកក្កដា ជាមួយនឹងការបញ្ចុះសពនៅក្នុងទីក្រុង Mashhad ដែលជាស្រុកកំណើតរបស់លោក ដោយមានការរៀបចំពិធីបន្ថែមនៅតាមបណ្តាទីក្រុងផ្សេងៗ និងនៅប្រទេសអ៊ីរ៉ាក់ផងដែរ។

កាលពីថ្ងៃពុធ រដ្ឋមន្ត្រីការបរទេសអ៊ីរ៉ង់ លោក អាប់បាស អារ៉ាក់ជី (Abbas Araqchi) ក៏បានចេញសារព្រមានស្រដៀងគ្នានេះដែរ បន្ទាប់ពីរដ្ឋមន្ត្រីការពារជាតិអ៊ីស្រាអែល បានលើកឡើងថាមេដឹកនាំកំពូលបច្ចុប្បន្ន លោក ម៉ូចតាបា ខាមេណៃ (Mojtaba Khamenei) កំពុងស្ថិតក្នុង «បញ្ជីមុខសញ្ញាត្រូវសម្លាប់» របស់ខ្លួន។ ទន្ទឹមនឹងនេះ អាជ្ញាធរអាកាសចរណ៍ស៊ីវិលអ៊ីរ៉ង់ ក៏បានប្រកាសពីការរឹតបន្តឹងដែនអាកាសបណ្តោះអាសន្ននៅតាមទីក្រុងជាច្រើន រួមទាំងទីក្រុងតេហេរ៉ង់ និង Mashhad ដើម្បីធានាសុវត្ថិភាពក្នុងអំឡុងពេលពិធីបុណ្យសពនេះផងដែរ៕