(ម៉ានីល)៖ ធនាគារពិភពលោក បានដំឡើងចំណាត់ថ្នាក់ប្រទេសហ្វីលីពីន ទៅជាប្រទេសមានចំណូលមធ្យមកម្រិតខ្ពស់ (UMIC) បន្ទាប់ពីប្រទេសនេះសម្រេចបានប្រាក់ចំណូលជាតិសម្រាប់មនុស្សម្នាក់ (GNI per capita) ក្នុងកម្រិតកំណត់ត្រា ៤,៨៥០ដុល្លារអាមេរិក ដែលនេះគឺជាគោលដៅអភិវឌ្ឍន៍ជាតិដែលហ្វីលីពីនប្រាថ្នាចង់បានតាំងពីទសវត្សរ៍ឆ្នាំ១៩៨០ មកម្ល៉េះ។ នេះបើយោងតាមការចុះផ្សាយដោយបណ្តាញសារព័ត៌មានអន្តរជាតិ។

ចំណាត់ថ្នាក់ប្រទេសមានចំណូលមធ្យមកម្រិតខ្ពស់ (UMIC) របស់ធនាគារពិភពលោក គឺសម្រាប់ប្រទេសដែលមានប្រាក់ចំណូលជាតិសម្រាប់មនុស្សម្នាក់ (GNI) ចន្លោះពី ៤,៦៣៦ដុល្លារ ទៅ ១៤,៣៧៥ដុល្លារ។ កាលពីឆ្នាំមុន ហ្វីលីពីនខ្វះតែ ២៦ដុល្លារប៉ុណ្ណោះ ទើបអាចឈានដល់កម្រិតនេះ ដោយទទួលបានត្រឹម ៤,៤៧០ដុល្លារ។ ធនាគារពិភពលោកបានកោតសរសើរថា ការឡើងឋានៈនេះ មិនមែនបានមកពីការរីកចម្រើនតែមួយវិស័យនោះទេ ប៉ុន្តែវាគឺជាការកើនឡើងនៃផលិតផលក្នុងស្រុកសរុប (GDP) ជាមធ្យម ៥,៨ភាគរយ ក្នុងមួយឆ្នាំ ក្នុងរយៈពេល ៥ឆ្នាំចុងក្រោយ ដែលឆ្លុះបញ្ចាំងពីភាពរឹងមាំនៃសេដ្ឋកិច្ចជារួម។

ប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជេអរ (Ferdinand Marcos Jr.) បានសម្តែងក្តីត្រេកអរយ៉ាងខ្លាំង ដោយចាត់ទុកសមិទ្ធផលនេះថាជាការឆ្លុះបញ្ចាំងពីភាពរឹងមាំរបស់ប្រជាជនហ្វីលីពីន និងប្រសិទ្ធភាពនៃគោលនយោបាយសេដ្ឋកិច្ចរដ្ឋាភិបាល។ លោកបានបញ្ជាក់ថា នេះគឺជាការកែប្រែប្រវត្តិសាស្ត្រ បន្ទាប់ពីប្រទេសដែលមានប្រជាជនជិត ១២០លាននាក់មួយនេះ បានស្ថិតក្នុងចំណាត់ថ្នាក់ជាប្រទេសចំណូលមធ្យមកម្រិតទាបអស់រយៈពេលជិត ៤ទសវត្សរ៍ (តាំងពីឆ្នាំ១៩៨៧)។

គួរបញ្ជាក់ថា ប្រព័ន្ធចាត់ចំណាត់ថ្នាក់ផ្អែកលើ GNI នេះ មិនមែនជាការវាស់វែងកម្រិតជីវភាពរស់នៅដោយផ្ទាល់នោះទេ ពោលគឺប្រទេសមួយអាចជា ប្រទេសមានចំណូលមធ្យមកម្រិតខ្ពស់ (UMIC) ទោះបីជាទ្រព្យសម្បត្តិប្រមូលផ្តុំតែលើមនុស្សមួយក្តាប់តូចក៏ដោយ។ អ្នកជំនាញសេដ្ឋកិច្ចបានវាយតម្លៃថា ភាពជោគជ័យរបស់ហ្វីលីពីន គឺបានមកពីអំណោយផលនៃប្រជាសាស្ត្រ ដែលប្រទេសនេះមានកម្លាំងពលកម្មវ័យក្មេងយ៉ាងច្រើនសន្ធឹកសន្ធាប់តាំងពីឆ្នាំ២០១៥ មក៕