(កៀវ)៖ អ៊ុយក្រែន និងរុស្ស៉ី នៅថ្ងៃព្រហស្បតិ៍ ទី២ ខែកក្កដា ឆ្នាំ២០២៦ បានសន្យាថានឹងបើកការវាយប្រហារសងសឹកដាក់គ្នាទៅវិញទៅមក បន្ទាប់ពីទីក្រុងមូស្គូបើកការវាយប្រហារទ្រង់ទ្រាយធំមួយ ដោយមីស៊ីលបាលិស្ទីគ និងដ្រូនលើទីក្រុងកៀវដោយសម្លាប់មនុស្សយ៉ាងហោច ២៧នាក់ ហើយអគារមួយចំនួនរងការខូចខាតធ្ងន់ធ្ងរ ព្រមទាំងធ្វើឱ្យប្រជាជនអ៊ុយក្រែនរាប់ពាន់នាក់រត់រក កន្លែងជ្រកកោន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថាកងកម្លាំងអ៊ុយក្រែននឹងសងសឹកដាច់ខាតចំពោះការវាយប្រហាររបស់រុស្ស៉ីកាលពីថ្ងៃព្រហស្បតិ៍ ខណៈរូបលោកធ្វើដំណើរទៅកាន់ទីតាំងដែលរងការវាយប្រហារពីរុស្ស៉ី។ ចំណែក វិមានក្រឹមឡាំងវិញក៏បានសន្យាដែរថាបង្កើនការដាក់សម្ពាធលើទីក្រុងកៀវ ជាការបញ្ជាក់បន្ថែមពីជំហរមិនព្រមសម្រុះសម្រួល។ បើតាមក្រុមមន្ត្រីអ៊ុយក្រែន មនុស្សយ៉ាងហោច ២៧នាក់ស្លាប់ និង៩១នាក់រងរបួសក្នុងការវាយប្រហាររបស់រុស្ស៉ី។

គួរបញ្ជាក់ថា បើតាមកងទ័ពអាកាសអ៊ុយក្រែន រុស្ស៉ីបានបាញ់ដ្រូន ៤៩៦គ្រឿង និងមីស៊ីល ៧៤គ្រាប់ ក្នុងនោះរួមមានទាំងមីស៊ីលបាលិស្ទីគដែលប្រព័ន្ធខែលការពារដែនអាកាសពិបាកស្ទាក់ចាប់។ អ៊ុយក្រែន បានអះអាងថាខ្លួនបានបាញ់ទម្លាក់ដ្រូន ៤៧៦គ្រឿង និងមីស៊ីល ៤៨គ្រាប់៕