(ដាម៉ាស)៖ ក្រសួងមហាផ្ទៃនៃប្រទេសស៉ីរី បានឱ្យដឹងថា ការផ្ទុះគ្រាប់បែកក្នុងហាងកាហ្វេមួយកន្លែង នៅទីក្រុងដាម៉ាស កាលពីថ្ងៃព្រហស្បតិ៍សប្តាហ៍នេះ បានសម្លាប់មនុស្ស ៩នាក់ និងរបួស ២០នាក់។ នេះបើយោងតាមការចេញផ្សាយដោយតីភ្នាក់ងារសារព័ត៌មាន Reuters នាថ្ងៃសុក្រ ទី៣ ខែកក្កដា ឆ្នាំ២០២៦។

ទូរទស្សន៍រដ្ឋស៉ីរីរាយការណ៍ថា គ្រាប់បែកត្រូវបានដាក់ក្នុងហាងកាហ្វេ ដែលមានទីតាំងក្បែរអគារតុលាការ កណ្តាលរដ្ឋធានីដាម៉ាស។ តាមក្រសួងមហាផ្ទៃស៉ីរី ការស៉ើបអង្កេតបឋមបង្ហាញថា វាជាគ្រាប់បែកឆៅ ទម្ងន់ប្រហែល ១គីឡូក្រាម និងផ្ទុកទៅដោយបំណែកដែក ដែលអាចបង្កឱ្យមានរបួសធ្ងន់ធ្ងរ និងការខូចខាតខ្លាំងនៅកន្លែងកើតហេតុ។ ភ្លាមៗ មិនទាន់មានក្រុមណាចេញមុខទទួលខុសត្រូវទេ។

នេះជាបញ្ហាប្រឈមផ្នែកសន្តិសុខមួយទៀត សម្រាប់រដ្ឋាភិបាលស៉ីរីរបស់ប្រធានាធិបតី Ahmed al-Sharaa ដែលបានឡើងកាន់អំណាច បន្ទាប់ពីផ្តួលរំលំអតីតប្រធានាធិបតី Bashar al-Assad នាចុងឆ្នាំ២០២៤។ តាំងពីពេលនោះមក នៅក្នុងទីក្រុងដាម៉ាស មានហេតុការណ៍សន្តិសុខមួយចំនួនកើតឡើង រួមទាំងការបំផ្ទុះគ្រាប់បែកក្នុងរថយន្តដែលបានសម្លាប់ទាហានស៉ីរីម្នាក់ និងធ្វើឱ្យមនុស្ស ១៨នាក់រងរបួសនៅខាងក្រៅក្រសួងការពារជាតិ កាលពីខែឧសភា៕