(វីលនីញូស)៖ ប្រធានាធិបតីលីទុយអានី បាននិយាយថា បណ្តាគណបក្សនយោបាយនៅក្នុងសភានៃប្រទេសនេះ បានឯកភាពគ្នា​លើផែនការលុបចោលបម្រាមរដ្ឋធម្មនុញ្ញ ស្តីពីវត្តមានអាវុធនុយក្លេអ៊ែរនិងមូលដ្ឋានយោធាបរទេស នៅក្នុងប្រទេសតំបន់បាល់ទិក​មួយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters កាលពីថ្ងៃព្រហស្បតិ៍ ទី២ ខែកក្កដា ឆ្នាំ២០២៦។

ការបោះជំហានខាងលើ គឺជាកំណែទម្រង់ច្បាប់ធំមួយ ដែលនឹងតម្រូវឱ្យមានសំឡេងគាំទ្រភាគច្រើន ២ភាគ៣ ក្នុងការបោះឆ្នោតពីរលើកនៅសភា ទើបអាចអនុម័តបាន។ វានឹងលុបចោលការរឹតត្បិត ដែលត្រូវបានអនុវត្តចាប់តាំងតែពី​ជាង៣ទសវត្សរ៍មុន ក្រោយលីទុយអានីបំបែកចេញពីសហភាពសូវៀត។

ថ្លែងប្រាប់ក្រុមអ្នកសារព័ត៌មាន ក្រោយជួបប្រជុំជាមួយមេដឹកនាំគណបក្សនយោបាយនៅក្នុងសភា កាលពីថ្ងៃព្រហស្បតិ៍ ប្រធានាធិបតី លោក Gitanas Nauseda បាននិយាយថា «ស្ថានការណ៍ភូមិសាស្រ្តនយោបាយ កំពុងកាន់តែអាក្រក់ទៅៗ។ រដ្ឋធម្មនុញ្ញរបស់យើងត្រូវបានសរសេរឡើង នៅពេលដែលកាលៈទេសៈភូមិសាស្រ្តនយោបាយ មានភាពផ្ទុយស្រឡះទាំងស្រុង»។

គួរបញ្ជាក់ថា លីទុយអានី គឺជាប្រទេសសមាជិកអង្គការ NATO ដែលមានព្រំប្រទល់ជាប់តំបន់ Kaliningrad របស់រុស្ស៉ី និង​ជាប់ប្រទេសបេឡារុស ដែលជាសម្ព័ន្ធមិត្តរបស់ទីក្រុងមូស្គូ ហើយបានបង្កើនការចំណាយលើវិស័យការពារជាតិធំជាងមុន៣ដង ចាប់តាំងពីការឈ្លានពានរបស់រុស្ស៉ីនៅអ៊ុយក្រែន កាលពីឆ្នាំ២០២២។

លោក Nauseda បានអះអាងថា ភ្លាមៗពុំទាន់មានផែនការដើម្បីទទួលយកការដាក់ពង្រាយអាវុធនុយក្លេអ៊ែរ នៅក្នុងទឹកដីលីទុយអានីទេ ប៉ុន្តែការលុបចោលការរឹតត្បិតនេះ នឹងអនុញ្ញាតឱ្យប្រទេសរបស់លោកធ្វើសកម្មភាព ប្រសិនស្ថានការណ៍សន្តិសុខប្រែប្រួល ហើយលីទុយអានីនឹងនៅតែបន្តជា ភាគីនៃសន្ធិសញ្ញាមិនរីកសាយអាវុធនុយក្លេអ៊ែរ។ ដោយឡែក ប្រធានសភាលីទុយអានី លោក Juozas Olekas បានប្រាប់ក្រុមអ្នកសារព័ត៌មានថា ការធ្វើវិសោធនកម្មនេះអាចត្រូវបានអនុម័ត នៅត្រឹមចុងឆ្នាំ២០២៦៕