(វ៉ាស៉ីនតោន)៖ កាលពីថ្ងៃព្រហស្បតិ៍ ទី២ ខែកក្កដា ឆ្នាំ២០២៦ ប្រធានាធិបតីអាមេរិក លោក ដូណាល់​ ត្រាំ បាននិយាយថា វាមិនសមហេតុផលទាល់តែសោះ ដែលសហរដ្ឋអាមេរិកត្រូវបន្តទំនាក់ទំនងលម្អៀងតែម្ខាង ជាមួយអង្គការ NATO ខណៈការលើកឡើងបែបនេះ គឺមិនដល់មួយសប្តាហ៍នោះទេ មុនការបើកកិច្ចប្រជុំកំពូល NATO នៅទីក្រុងអង់ការ៉ានៃប្រទេសតួកគីយ៉េ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក ត្រាំ បានបង្ហោះសារនៅលើបណ្តាញសង្គម Truth Social យ៉ាងដូច្នេះថា «ពួកគេមិនបានគាំទ្រយើង ហើយទំនាក់ទំនងរបស់​ទីក្រុងវ៉ាស៉ីនតោនជាមួយ NATO គឺគ្មានលក្ខណៈមានទៅមានមកនោះទេ»។ លោកប្រធានាធិបតីអាមេរិក កន្លងមកនេះ បានរិះគន់ម្តងហើយម្តងទៀត ចំពោះបណ្តាសម្ព័ន្ធមិត្តនៅអឺរ៉ុប ជុំវិញការឆ្លើយតបរបស់ពួកគេ ចំពោះសង្រ្គាមនៅអ៉ីរ៉ង់ ស្របពេល​ដែលប្រទេសមួយចំនួន បានរឹតត្បិតការប្រើប្រាស់មូលដ្ឋានយោធា សម្រាប់កងកម្លាំងអាមេរិក។

ក្រោមសម្ពាធពីសំណាក់លោក ត្រាំ ក្រុមមេដឹកនាំ NATO បានឯកភាពគ្នា អំឡុងកិច្ចប្រជុំកំពូលកាលពីឆ្នាំ២០២៥ ដើម្បីបង្កើនការចំណាយ​ពាក់ព័ន្ធវិស័យការពារជាតិ ដល់៥ភាគរយនៃអត្រា GDP ត្រឹមឆ្នាំ២០៣៥។ កិច្ចប្រជុំកំពូល NATO ខាងមុខនេះ នឹងប្រព្រឹត្តទៅនៅរដ្ឋធានីរបស់តួកគីយ៉េ នាថ្ងៃទី៧-៨ ខែកក្កដា។

គួរបញ្ជាក់ថា NATO ដែលបច្ចុប្បន្នមានសមាជិក៣២ប្រទេស ត្រូវបានបង្កើតឡើងដំបូងតាំងពីឆ្នាំ១៩៤៩ ហើយបានក្លាយជា​បក្សសម្ព័ន្ធការពារជាតិមួយដឹកនាំដោយអាមេរិក ដែលជួយរក្សាស្ថិរភាពនៅអឺរ៉ុប ដោយទប់ស្កាត់សហភាពសូវៀត ព្រមទាំងពង្រឹង​ឋានៈរបស់ទីក្រុងវ៉ាស៉ីនតោន ជាកំពូលមហាអំណាចពិភពលោក មកទល់សព្វថ្ងៃ៕