(យ៉ាងហ្គោន)៖ ប្រធានាធិបតីមីយ៉ាន់ម៉ា លោក Min Aung Hlaing ដែលជាអតីតប្រមុខដឹកនាំនៃរបបសឹក បានទៅដល់ប្រទេសឡាវ នាថ្ងៃសុក្រ ទី៣ ខែកក្កដា ឆ្នាំ២០២៦ ក្នុងដំណើរទស្សនកិច្ចដំបូងនៅប្រទេសអាស៊ាន ចាប់តាំងពីក្លាយជាមេដឹកនាំនៃរដ្ឋាភិបាលស៉ីវិល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

តាមរូបភាពពីក្រុមការងារព័ត៌មានរបស់ប្រធានាធិបតីមីយ៉ាន់ម៉ា លោក Min Aung Hlaing ទៅដល់ប្រទេសឡាវ នៅព្រឹកនេះ រួមជាមួយភរិយា គឺលោកស្រី Kyu Kyu Hla។ ប្រព័ន្ធផ្សព្វផ្សាយក្នុងស្រុករបស់ឡាវ រាយការណ៍ថា នេះជាដំណើរទស្សនកិច្ចផ្លូវរដ្ឋ មានរយៈពេល ៣ថ្ងៃ។

នៅក្នុងសេចក្តីថ្លែងការណ៍កាលពីដើមសប្តាហ៍នេះ ការិយាល័យលោក Min Aung Hlaing បានប្រកាសថា លោកនឹងជួបប្រធានាធិបតីឡាវ លោក Thongloun Sisoulith និងនាយករដ្ឋមន្រ្តីឡាវ លោក Sonexay Siphandone។ សេចក្តីថ្លែងការណ៍ដដែល គូសបញ្ជាក់ថា លោកប្រធានាធិបតី នឹងចូលរួមផ្លាស់ប្តូរទស្សនៈ ដោយភាពស្និទ្ធស្នាល និងបើកចំហ ដើម្បីជំរុញការពង្រឹងទំនាក់ទំនងមិត្តភាពដែលមានស្រាប់៕