(សិង្ហបុរី)៖ រោងចក្រចម្រាញ់ប្រេងឯកជនរបស់ប្រទេសចិន កំពុងសម្រុកទិញប្រេងឆៅតម្លៃថោកពីតំបន់មជ្ឈិមបូព៌ា ខណៈការផ្គត់ផ្គង់ប្រេងចូលមកកាន់ទីផ្សារចិនកំពុងមានការកើនឡើងយ៉ាងខ្លាំង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters កាលពីថ្ងៃពុធ។

ការនាំចេញប្រេងពីតំបន់ឈូងសមុទ្រមកកាន់អាស៊ី បានកើនឡើងយ៉ាងគំហុក បន្ទាប់ពីប្រទេសផលិតប្រេងបង្កើនទិន្នផល និងការនាំចេញតាមច្រកសមុទ្រហ័រមូស ក្រោយមានកិច្ចព្រមព្រៀងសន្តិភាពបណ្តោះអាសន្នរវាងអាមេរិក និងអ៊ីរ៉ង់។ ការសម្រុកទិញប្រេងពីមជ្ឈិមបូព៌ា (ក្រៅពីប្រេងអ៊ីរ៉ង់) យ៉ាងសន្ធឹកសន្ធាប់របស់ចិននៅពេលនេះ បានដាក់សម្ពាធយ៉ាងខ្លាំងលើប្រេងរុស្ស៊ី និងអ៊ីរ៉ង់ ដែលបង្ខំឱ្យប្រទេសទាំងពីរត្រូវបញ្ចុះតម្លៃលក់កាន់តែខ្លាំង ដើម្បីប្រកួតប្រជែង។

ប្រភពពាណិជ្ជកម្មបានឱ្យដឹងថា ក្រុមហ៊ុនប្រេងជាតិអាប៊ុយដាប៊ី (ADNOC) បានលក់ប្រេងឆៅ ៤លានធុង ទៅឱ្យក្រុមហ៊ុនចិនចំនួនពីរ ក្នុងតម្លៃបញ្ចុះចន្លោះពី ៧ ទៅ ៩ដុល្លារក្នុងមួយធុង។ ទន្ទឹមនឹងនេះ ក្រុមហ៊ុនចិនផ្សេងទៀតក៏បានបញ្ជាទិញប្រេងឆៅរបស់អ៊ីរ៉ាក់ និងកាតា រាប់លានធុងផងដែរ ដោយទទួលបានការបញ្ចុះតម្លៃប្រមាណ ៥ដុល្លារក្នុងមួយធុង។

អ្នកជួញដូរប្រេងម្នាក់នៅសិង្ហបុរីបានបញ្ជាក់ថា រោងចក្រចម្រាញ់ប្រេងកំពុងមមាញឹកយ៉ាងខ្លាំងក្នុងការវាយតម្លៃលើសំណើលក់ប្រេងពីមជ្ឈិមបូព៌ា ដែលសុទ្ធសឹងតែផ្តល់ការបញ្ចុះតម្លៃយ៉ាងទាក់ទាញ ដោយសារការផ្គត់ផ្គង់ហក់ឡើងខ្ពស់។ ស្ថានភាពនេះបានជួយឱ្យរោងចក្រចម្រាញ់ប្រេងនៅចិន អាចទទួលបានប្រាក់ចំណេញចន្លោះពី ២០០ ទៅ ៤០០យាន់ (២៩-៥៩ដុល្លារ) ក្នុងមួយតោន បន្ទាប់ពីធ្លាប់ខាតបង់កាលពីខែមិថុនាកន្លងទៅ៕