(ឡុងដ៍)៖ ប្រភពពីមន្ត្រីអ៊ីរ៉ង់ និងលោកខាងលិច បានបង្ហើបកាលពីថ្ងៃពុធថា ប្រទេសអ៊ីរ៉ង់ បានចាប់ផ្តើមការចរចាជាមួយក្រុមហ៊ុនជប៉ុន ក្រោមកិច្ចព្រមព្រៀងលើកលែងទណ្ឌកម្មរបស់សហរដ្ឋអាមេរិក ដើម្បីបើកការនាំចេញប្រេងឡើងវិញ។ ប៉ុន្តែក្រុមហ៊ុនទិញប្រេងរបស់ជប៉ុន កំពុងទាមទារឱ្យមានការពន្យារពេលលើកលែងទណ្ឌកម្មនេះឱ្យបានយូរជាងមុន ព្រមទាំងទាមទារការធានាសុវត្ថិភាពចំពោះកប៉ាល់ដឹកជញ្ជូន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការលើកលែងទណ្ឌកម្ម ដែលជាផ្នែកមួយនៃកិច្ចចរចាសន្តិភាពរយៈពេល ៦០ថ្ងៃ រវាងទីក្រុងតេហេរ៉ង់ និងវ៉ាស៊ីនតោន ត្រូវបានប្រកាសកាលពីថ្ងៃទី២២ ខែមិថុនា ហើយនឹងផុតកំណត់នៅថ្ងៃទី២១ ខែសីហាខាងមុខ។ ប្រភពពីអ៊ីរ៉ង់ចំនួនពីររូប បានបង្ហើបថា បច្ចុប្បន្នមានក្រុមហ៊ុនទិញប្រេងរបស់ជប៉ុនចំនួន ៣ កំពុងពិចារណាលើការទិញប្រេងឆៅពីអ៊ីរ៉ង់ ដែលនេះគឺជាការទិញលើកដំបូងបង្អស់ ចាប់តាំងពីឆ្នាំ២០១៩មក។ ប្រភពពីលោកខាងលិចក៏បានបញ្ជាក់ដែរថា មន្ត្រីជប៉ុន និងអ៊ីរ៉ង់កំពុងស្ថិតក្នុងដំណាក់កាលពិភាក្សាបឋមជុំវិញការទិញលក់ប្រេងនេះ។

ទោះជាយ៉ាងណា មន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន (METI) បានអះអាងថាលោកមិនបានដឹងពីបញ្ហានេះទេ ខណៈដែលក្រសួងការបរទេសជប៉ុន និងក្រសួងរតនាគារអាមេរិក មិនទាន់មានការឆ្លើយតបណាមួយនៅឡើយ។

គួររំលឹកថា កាលពីឆ្នាំ២០១៨ ប្រទេសជប៉ុន កូរ៉េខាងត្បូង ឥណ្ឌា និងបណ្តាប្រទេសអឺរ៉ុប បានបញ្ឈប់ការទិញប្រេងពីអ៊ីរ៉ង់ទាំងស្រុង បន្ទាប់ពីប្រធានាធិបតីអាមេរិក លោក ដូណាល់ ត្រាំ បានដកអាមេរិកចេញពីកិច្ចព្រមព្រៀងនុយក្លេអ៊ែរ និងបានរឹតបន្តឹងទណ្ឌកម្មសេដ្ឋកិច្ចយ៉ាងធ្ងន់ធ្ងរ។ ចាប់តាំងពីពេលនោះមក ប្រទេសចិនបានក្លាយជាអតិថិជនដ៏ធំបំផុត និងចម្បងតែមួយគត់របស់អ៊ីរ៉ង់៕