(សាណា)៖ កាលពីថ្ងៃសុក្រ ទី៣ ខែកក្កដា ឆ្នាំ២០២៦ ក្រុមហ៊ូទីនៅប្រទេសយេម៉ែន បានគំរាមវាយប្រហារអាកាសយានដ្ឋាន និងទីតាំងសំខាន់របស់ប្រទេសអារ៉ាប៊ីសាអូឌីត ប្រសិនបើទីក្រុងរីយ៉ាដបំពានដែនអាកាស ឬប៉ុនប៉ងវាយប្រហារលើខ្លួន ខណៈក្រុមឧទ្ទាមនេះចោទប្រកាន់ អារ៉ាប៊ីសាអូឌីតថា បានព្យាយាមរារាំងយន្តហោះអ៉ីរ៉ង់១គ្រឿងមិនឱ្យចុះចត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

អ្នកនាំពាក្យយោធារបស់ក្រុមហ៊ូទី លោក Yahya Saree បាននិយាយថា កងកម្លាំងហ៊ូទីបានទប់ស្កាត់ការប៉ុនប៉ងដោយយន្តហោះចម្បាំងអារ៉ាប៊ីសាអូឌីត ដែលព្យាយាមទន្ទ្រានចូលដែនអាកាសរបស់យេម៉ែន ក្នុងគោលដៅចង់រារាំងយន្តហោះស៉ីវិលអ៉ីរ៉ង់១គ្រឿង ដែលផ្ទុកពលរដ្ឋរងរបួសនិងឈឺថ្កាត់ប្រហែលជាង​២០០នាក់ មិនឱ្យចុះចតនៅអាកាសយានដ្ឋានអន្តរជាតិ Sanaa។

រីឯបើតាមប្រព័ន្ធផ្សព្វផ្សាយរបស់ក្រុមហ៊ូទី យន្តហោះនោះគឺបានត្រឡប់ទៅទីក្រុងតេហេរ៉ង់វិញហើយ ដោយមានដឹកប្រតិភូហ៊ូទី ដែលត្រូវចូលរួមពីធីបុណ្យសព​អតីតមេដឹកនាំកំពូលអ៉ីរ៉ង់ លោក Ayatollah Ali Khamenei ដែលត្រូវបានសម្លាប់ ក្នុងការវាយប្រហារតាមអាកាសរួមគ្នារវាងអាមេរិកនិងអ៉ីស្រាអែល ដែលបានបង្កឱ្យផ្ទុះជាសង្រ្គាមនៅមជ្ឈិមបូព៌ា។

លោក Saree បានបន្តយ៉ាងដូច្នេះថា «ពួកយើងសូមព្រមានអារ៉ាប៊ីសាអូឌីត កុំព្យាយាមទៀតឱ្យសោះមកបំពានដែនអាកាស ឬធ្វើសកម្មភាពបំពានណាមួយ ដែលមានគោលដៅមកលើប្រទេសរបស់យើង។ សកម្មភាពបែបនោះ នឹងត្រូវទទួលរងទៅវិញ នូវការឆ្លើយតបគ្រប់ជ្រុងជ្រោយ ប្រឆាំងលើអាកាសយានដ្ឋាន ព្រមទាំងផលប្រយោជន៍សំខាន់ៗរបស់អារ៉ាប៊ីសាអូឌីត នៅលើដីគោកនិងផ្ទៃទឹក»។

ការគំរាមខាងលើកើតមានឡើង ក្រោយពេលវេលាស្ងប់ស្ងាត់មួយ រវាងអារ៉ាប៊ីសាអូឌីត និងក្រុមឧទ្ទាមហ៊ូទីដែលមានអ៉ីរ៉ង់ជាខ្នងបង្អែក ខណៈក្រុមនេះ មិនបានវាយប្រហារក្រុមប្រទេសឈូងសមុទ្រអារ៉ាប់ទេ អំឡុងសង្រ្គាមមជ្ឈិមបូព៌ា បើទោះបីជាអ៉ីរ៉ង់បានវាយប្រហារប្រទេសទាំងនោះ ដើម្បីសងសឹកអាមេរិកនិង​អ៉ីស្រាអែលក៏ដោយ។

គួរបញ្ជាក់ថា ក្រុមហ៊ូទីកាន់កាប់រដ្ឋធានី Sanaa របស់ប្រទេសយេម៉ែន រួមទាំងទឹកដីភាគច្រើននៅភាគខាងជើង ខណៈរដ្ឋាភិបាលដែលគាំទ្រដោយអារ៉ាប៊ីសាអូឌីត ហើយមាន​ការទទួលស្គាល់ជាអន្តរជាតិ គ្រប់គ្រងទឹកដីភាគច្រើននៅភាគខាងត្បូង។ យ៉ាងណាមិញ ការប្រយុទ្ធគ្នារវាងភាគីទាំងពីរ គឺត្រូវបានផ្អាកចាប់តាំងពីមានបទឈប់បាញ់ចរចាដោយអង្គការការសហប្រជាជាតិ កាលពីឆ្នាំ២០២២៕