(ប៉េកាំង)៖ កាលពីថ្ងៃសុក្រ ទី៣ ខែកក្កដា ឆ្នាំ២០២៦ ចិនបានចេញមុខនិយាយថា កិច្ចសហប្រតិបត្តិការរវាងឥណ្ឌានិងជប៉ុន មិនគួរមានគោលដៅប្រឆាំងទីក្រុងប៉េកាំងឡើយ បន្ទាប់ពីមេដឹកនាំប្រទេសទាំងពីរ បានឯកភាពគ្នាធ្វើការឱ្យកាន់តែជិតស្និទ្ធ លើវិស័យរ៉ែសំខាន់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ទំនិញយុទ្ធសាស្រ្តខាងលើ ដែលត្រូវបានប្រើប្រាស់ក្នុងរបស់របរគ្រប់បែបយ៉ាង រាប់ចាប់ពីយានជំនិះអគ្គិសនី និងស្មាតហ្វូន រហូតដល់ម៉ាស៉ីនយន្តហោះ និងមីស៉ីល បានលេចឡើងជាប្រធានបទចម្បង អំឡុងកិច្ចពិភាក្សារវាងនាយករដ្ឋមន្រ្តីឥណ្ឌា លោក Narendra Modi និងសមភាគីជប៉ុន លោកស្រី Sanae Takaichi នៅទីក្រុងញូវដែលី កាលពីថ្ងៃព្រហស្បតិ៍សប្តាហ៍នេះ។

នៅពេលត្រូវបានសាកសួរអំពីជំនួបខាងលើ ក្រសួងការបរទេសចិន បាននិយាយថា ប្រទេសនានាគួរតែធ្វើការជាមួយគ្នា ដើម្បីកសាងការយោគយល់និងជឿទុកចិត្ត។ អ្នកនាំពាក្យក្រសួងការបរទេសចិន លោក Guo Jiakun បានលើកឡើងដូច្នេះថា «កិច្ចសហប្រតិបត្តិការរវាងប្រទេសទាំងឡាយ មិនគួរមានគោលដៅលើឬប៉ះពាល់​ផលប្រយោជន៍របស់ភាគីទី៣ ឬក៏បម្រើជាលេសដើម្បីបង្កើតបក្ខពួកផ្តាច់មុខ ឬដុតបញ្ឆេះការប្រឈមមុខដាក់គ្នាឡើយ»។

ទំនាក់ទំនងរវាងទីក្រុងប៉េកាំងនិងទីក្រុងតូក្យូ បានធ្លាក់ចុះដុនដាបខ្លាំង ចាប់តាំងពីលោកស្រី Takaichi បានលើកឡើងកាលពីខែវិច្ឆិកា ឆ្នាំ២០២៥ថា ក្នុងករណីចិន​វាយប្រហារកោះតៃវ៉ាន់ នោះអាចនឹងបង្ខំឱ្យជប៉ុនត្រូវធ្វើអន្តរាគមន៍យោធា។ ជាផ្នែកមួយនៃចំណាត់ការប្រឆាំងទីក្រុងតូក្យូ អាជ្ញាធរចិនបានរឹតត្បិត​លំហូររ៉ែកម្រទៅកាន់ជប៉ុន ខណៈវាជាវិស័យមួយដែលចិនគ្របដណ្តប់លើពិភពលោក ទាំងផ្នែកខួងយកនិងកែច្នៃ។

គួរបញ្ជាក់ថា ក្នុងសប្តាហ៍នេះ ក្រសួងពាណិជ្ជកម្មចិន បានកត់ឈ្មោះក្រុមហ៊ុនជប៉ុនចំនួន២០ ចូលក្នុងបញ្ជីខ្មៅនៃការនាំចេញ ក្រោមហេតុផលថា ពួកគេបានជួយ​បង្កើនសមត្ថភាពយោធារបស់ទីក្រុងតូក្យូ ដែលជារឿងគួរឱ្យបារម្ភ។ ជប៉ុនបានចេញមុខហៅទង្វើនោះថា មិនអាចទទួលយកបាននិងគួរឱ្យសោកស្តាយ ហើយទាមទារឱ្យប្រែក្រឡាស់វិញ៕