(ហ៊្សេរុយសាឡិម)៖ ការិយាល័យនាយករដ្ឋមន្រ្តីអ៉ីស្រាអែល បានឱ្យដឹងថា នាយករដ្ឋមន្រ្តី លោក បេនចាមីន ណេតាន់យ៉ាហ៊ូ និងប្រធានាធិបតីអាមេរិក លោក ដូណាល់ ត្រាំ កាលពីថ្ងៃសុក្រ ទី៣ ខែកក្កដា ឆ្នាំ២០២៦ បានសន្ទនាតាមទូរសព្ទ ហើយបានឯកភាពជួបមុខគ្នាផ្ទាល់ ក្នុងពេលឆាប់ៗនៅឯសហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

កិច្ចសន្ទនាខាងលើកើតមានឡើង បន្ទាប់ពីសហរដ្ឋអាមេរិកនិងអ៉ីស្រាអែល ពីដំបូងបានរួមគ្នាធ្វើសង្រ្គាមប្រឆាំងប្រទេសអ៉ីរ៉ង់ តែក្រោយមកមានសេចក្តីរាយការណ៍ ពីភាពតានតឹងរវាងមេដឹកនាំទាំងពីរ ជុំវិញកិច្ចប្រឹងប្រែងដើម្បីបិទបញ្ចប់សង្រ្គាមវិញ។ សេចក្តីថ្លែងការណ៍ពីការិយាល័យលោក ណេតាន់យ៉ាហ៊ូ បានឱ្យដឹងថា អំឡុងកិច្ចសន្ទនានោះ លោកនាយករដ្ឋមន្រ្តីអ៉ីស្រាអែល បានលើកឡើងថា សហរដ្ឋអាមេរិក គឺជាអ្នកធានាសេរីភាពពិភពលោក ហើយអ៉ីស្រាអែលវាយតម្លៃខ្ពស់​ចំពោះទំនាក់ទំនងជិតស្និទ្ធរវាងប្រទេសទាំងពីរ ខណៈនាឱកាសនោះ លោក ណេតាន់យ៉ាហ៊ូ និងលោក ត្រាំ ក៏បានយល់ព្រមជួបគ្នាផ្ទាល់ក្នុងពេលឆាប់ៗ នៅសហរដ្ឋអាមេរិក។

គួរបញ្ជាក់ថា ទីក្រុងវ៉ាស៉ីនតោន គឺជាសម្ព័ន្ធមិត្តដែលចាក់ទឹកមិនលិចឡើយរបស់អ៉ីស្រាអែល ប៉ុន្តែលោក ត្រាំ ប៉ុន្មានសប្តាហ៍ចុងក្រោយនេះ ហាក់បានរិះគន់ជាចំហ​ចំពោះលោក ណេតាន់យ៉ាហ៊ូ បន្ទាប់ពីសង្រ្គាមរបស់អ៉ីស្រាអែលប្រឆាំងក្រុមហេសបូឡានៅប្រទេសលីបង់ គំរាមកំហែងកិច្ចចរចាស្វែងរកសន្តិភាពជាមួយអ៉ីរ៉ង់៕