(តេហេរ៉ង់)៖ នាថ្ងៃសៅរ៍ ទី៤ ខែកក្កដា ឆ្នាំ២០២៦ អ៉ីរ៉ង់បានចាប់ផ្តើមជាផ្លូវការ នូវការប្រារព្ធពិធីបុណ្យសពជាសាធារណៈ សម្រាប់អតីតមេដឹកនាំកំពូលរបស់ខ្លួន គឺលោក Ayatollah Ali Khamenei ដែលបានបាត់បង់ជីវិត អំឡុងសង្រ្គាមរួមគ្នារបស់អាមេរិកនិងអ៉ីស្រាអែល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ប្រជាជនអ៉ីរ៉ង់រាប់ពាន់នាក់ បានប្រមូលផ្តុំនៅទីលាននៃព្រះវិហារ Grand Mosalla ក្នុងរដ្ឋធានីតេហេរ៉ង់ ជាទីដែលសពរបស់លោក Khamenei កំពុងត្រូវបានតម្កល់ទុក។ បើតាមប្រព័ន្ធផ្សព្វផ្សាយអ៉ីរ៉ង់ កាលពីថ្ងៃសុក្រ ឥស្សរជនមកពីប្រទេសជាច្រើន រួមមានទាំងអារ៉ាប៊ីសាអូឌីត អ៉ីរ៉ាក់ ចិន ប៉ាគីស្ថាន និងរុស្ស៉ី ព្រមទាំងបណ្តាថ្នាក់ដឹកនាំអ៉ីរ៉ង់ផ្ទាល់ បាននាំគ្នាចូលរួមសម្តែងការគោរពចំពោះវិញ្ញាណក្ខន្ធលោក Khamenei។

តាមសេចក្តីរាយការណ៍ អាជ្ញាធរអ៉ីរ៉ង់បានប្រកាសផ្តល់មធ្យោបាយធ្វើដំណើរ ម្ហូបអាហារ និងកន្លែងស្នាក់នៅ ដើម្បីលើកទឹកចិត្ត​ឱ្យមានមនុស្សដល់រាប់លាននាក់ ចូលរួមពិធីដង្ហែសពរបស់លោក Khamenei ដែលត្រូវបានគេមើលឃើញថា មានគោលដៅដើម្បីពង្រឹងសាមគ្គីភាពជាតិ។ កម្មវិធីពិធីបុណ្យសពនេះ នឹងប្រព្រឹត្តទៅ​រយៈពេលសរុប៦ថ្ងៃ ដោយបិទបញ្ចប់ជាមួយការបញ្ចុះសពក្នុងថ្ងៃទី៩ ខែកក្កដា នៅឯស្រុកកំណើតរបស់លោក Khamenei។

ការចាប់ផ្តើមពិធីបុណ្យសពខាងលើ គឺជួនពេលគ្នាជាមួយខួបទី២៥០ នៃការទទួលបានឯករាជ្យរបស់សហរដ្ឋអាមេរិក។ ប្រព័ន្ធផ្សព្វផ្សាយអាមេរិក CNN បាននិយាយថា អ៉ីរ៉ង់បានជ្រើសរើសយកថ្ងៃទី៤ ខែកក្កដានេះ ដោយចេតនា ដើម្បីផ្ញើសារមួយទៅកាន់ប្រធានាធិបតីអាមេរិក លោក ដូណាល់ ត្រាំ។ លោក Khamenei រួមទាំងកូនស្រីនិងចៅរបស់លោក ត្រូវបានសម្លាប់ កាលពីថ្ងៃទី២៨ ខែកុម្ភៈ ដែលជាថ្ងៃដំបូងនៃការបំផ្ទុះសង្រ្គាមរបស់អាមេរិកនិងអ៉ីស្រាអែលប្រឆាំងអ៉ីរ៉ង់ ខណៈកូនប្រុសរបស់លោក គឺលោក Mojtaba Khamenei បានរងរបួស ហើយត្រូវបានតែងតាំងជាមេដឹកនាំកំពូលថ្មី។

គួរបញ្ជាក់ថា ការរៀបចំពិធីបុណ្យសពរបស់លោក Ali Khamenei ធ្វើឡើងក្នុងចន្លោះពេលវេលា៦០ថ្ងៃ ដែលអាមេរិកនិងអ៉ីរ៉ង់ បានឯកភាពគ្នា ដើម្បីទុកពេលចរចាស្វែងរកកិច្ចព្រមព្រៀងផ្លូវការ​គ្រប់ជ្រុងជ្រោយមួយ សំដៅបិទបញ្ចប់សង្រ្គាមជាស្ថាពរ ដោយផ្អែកលើអនុស្សរណៈយោគយល់ ដែលភាគីទាំងពីរទើបចុះហត្ថលេខា កាលពីពេលថ្មីៗនេះ៕