(មូស្គូ)៖ ក្រុមមន្ត្រីរុស្ស៉ី នៅថ្ងៃសៅរ៍ ទី៤ ខែកក្កដា ឆ្នាំ២០២៦ បានឱ្យដឹងថារុស្ស៉ីបានបាញ់ទម្លាក់ដ្រូនអ៊ុយក្រែនរាប់សិបគ្រឿង នៅក្នុងទីក្រុង Saint Petersburg ខណៈស្ថានីយប្រេងឥន្ធនៈមួយកន្លែងរងការវាយប្រហារ ហើយបំណែកដ្រូនធ្លាក់ចំកំពង់ផែដ៏សំខាន់មួយ ព្រមទាំងទីតាំងប្រវត្តិសាស្ត្រមួយកន្លែង។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការវាយប្រហារដោយដ្រូនរបស់អ៊ុយក្រែនលើទីក្រុង Saint Petersburg ដែលជាទឹកដីកំណើតរបស់លោកប្រធានាធិបតី វ្ល៉ាឌីមៀ ពូទីន កើតមានឡើងបន្ទាប់ពីរុស្ស៉ីបើកការវាយប្រហារទ្រង់ទ្រាយធំលើទីក្រុងកៀវសម្លាប់មនុស្ស៣០នាក់ក្នុងសប្ដាហ៍នេះ។ អ៊ុយក្រែនបានបង្កើនការវាយប្រហារដោយប្រើដ្រូនលើបណ្ដាទីក្រុងរុស្ស៉ីដែលស្ថិតនៅឆ្ងាយពីតំបន់ព្រំដែន ជាការសងសឹកទៅនឹងការវាយប្រហារស្ទើររាល់ថ្ងៃរបស់រុស្ស៉ីនៅក្នុងសង្រ្គាមប្រឆាំងអ៊ុយក្រែនចាប់តាំងពីខែកុម្ភៈ ឆ្នាំ២០២២មក។

បើតាមអភិបាលក្រុង Saint Petersburg លោក Alexander Beglov ប្រព័ន្ធការពារដែនអាកាសរុស្ស៉ីបានបាញ់ទម្លាក់ដ្រូនអ៊ុយក្រែន ៧២គ្រឿង ក្នុងនោះមានមួយគ្រឿងបានធ្លាក់ចំវិមាន Peterhof។ លោកបន្ថែមថាមិនមានសេចក្ដីរាយការណ៍ពីជនរងគ្រោះ ឬការខូចខាតនោះទេ៕