(ប៉េកាំង)៖ ចិន នៅថ្ងៃសៅរ៍ ទី៤ ខែកក្កដា ឆ្នាំ២០២៦ បាននិយាយថាខ្លួនបានបើកប្រតិបត្តិការល្បាតឆ្មាំសមុទ្រសាជាថ្មី នៅភាគខាងកើតកោះតៃវ៉ាន់ បន្ទាប់ពីបណ្ដាប្រទេសលោកខាងលិច បង្ហាញការព្រួយបារម្ភចំពោះប្រតិបត្តិការល្បាតដូចគ្នានេះកាលពីខែមិថុនាកន្លងទៅ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ចិនបានធ្វើសកម្មភាពយោធាស្ទើរតែរៀងរាល់ថ្ងៃនៅជុំវិញកោះតៃវ៉ាន់ ដែលទីក្រុងប៉េកាំងចាត់ទុកថាជាផ្នែកមួយនៃទឹកដីរបស់ខ្លួន។ ប៉ុន្តែចិនឥលូវបានចាប់ផ្ដើមប្រើឆ្មាំសមុទ្ររបស់ខ្លួន ដើម្បីពង្រឹងការទាមទាមទឹកដីរបស់ខ្លួន។ នៅក្នុងសេចក្ដីថ្លែងការណ៍មួយ កងឆ្មាំសមុទ្រចិនបានឱ្យដឹងថានាវាឆ្មាំសមុទ្រចិននឹងដឹកនាំប្រតិបត្តិការល្បាតអនុវត្តច្បាប់នៅក្នុងតំបន់ដែលស្ថិតនៅ ក្រោមយុត្តាធិការរបស់ចិន។ សេចក្ដីថ្លែងការណ៍ដដែលបន្ថែមថាឆ្មាំសមុទ្រចិននឹងការពារយ៉ាងម៉ឺងម៉ាត់នូវអធិបតេយ្យទឹកដី ព្រមទាំងសិទ្ធិដែនសមុទ្រ និងផលប្រយោជន៍របស់ចិន។

គួរបញ្ជាក់ថា នេះគឺជាលើកទី២ហើយដែលចិនក្នុងពេលរយៈពេលជិតមួយខែមកនេះ បានបញ្ជូននាវាឆ្មាំសមុទ្រទៅកាន់ដែនទឹកនៃឆ្នេរភាគខាងកើតតៃវ៉ាន់។ សហរដ្ឋអាមេរិក បារាំង អាល្លឺម៉ង់ និងចក្រភពអង់គ្លេសសុទ្ធតែធ្លាប់បានបង្ហាញការព្រួយបារម្ភចំពោះប្រតិបត្តិការរបស់ចិន។ ចិនកាលពីខែមិថុនា បាននិយាយថាប្រតិបត្តិការល្បាតរបស់ខ្លួនធ្វើឡើងជាការឆ្លើយតបទៅនឹងការប្រកាសមួយធ្វើឡើងដោយជប៉ុន និងហ្វីលីពីន ដែលថាពួកគេនឹងចាប់ផ្ដើមបើកកិច្ចពិភាក្សាផ្លូវការមួយការកំណត់ព្រំដែនសមុទ្ររវាងប្រទេសទាំង២ ដែលទីក្រុងប៉េកាំងមើលឃើញថា មានជាប់ពាក់ព័ន្ធនឹងតៃវ៉ាន់៕