(បាដាដ)៖ គណៈរដ្ឋមន្ត្រីនៃប្រទេសអ៉ីរ៉ាក់ បានអនុម័តឱ្យក្រុមហ៊ុនប្រេង Basra ចុះហត្ថលេខាលើកិច្ចព្រមព្រៀងបឋម និងកិច្ចព្រមព្រៀងមិនបញ្ចេញព័ត៌មាន ជាមួយសម្ព័ន្ធក្រុមហ៊ុននានា រួមទាំងក្រុមហ៊ុនអាមេរិក Capital TI ក្រុមហ៊ុន Chevron និងក្រុមហ៊ុន UCC របស់ប្រទេសកាតា ដើម្បីសិក្សាគម្រោងបំពង់បង្ហូរប្រេងយុទ្ធសាស្ត្រសម្រាប់ការនាំចេញ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអាទិត្យ ទី៥ ខែកក្កដា ឆ្នាំ២០២៦។

សម្ព័ន្ធក្រុមហ៊ុនដែលទើបអនុម័តនេះ នឹងសិក្សាទៅលេីលទ្ធភាព ដើម្បីពង្រីកបំពង់បង្ហូរប្រេងឆៅពីទីក្រុង Haditha ទៅកាន់កំពង់ផែ Ceyhan នៃតំបន់មេឌីទែរ៉ាណេរបស់ប្រទេសតួកគីយ៉េ ក៏ដូចជាផ្លូវវាងទៅកាន់តំបន់ Baniyas ក្នុងប្រទេសស៉ីរី។ តាមគណៈរដ្ឋមន្ត្រីអ៉ីរ៉ាក់ កិច្ចព្រមព្រៀងទាំងនេះ នឹងមិនបង្កើតកាតព្វកិច្ចហិរញ្ញវត្ថុ ឬកិច្ចសន្យាថ្មី សម្រាប់ក្រសួងប្រេងអ៉ីរ៉ាក់ឡើយ។

គួរបញ្ជាក់ថា ជាទូទៅ ការនាំចេញប្រេងរបស់ប្រទេសអ៉ីរ៉ាក់ត្រូវឆ្លងកាត់ច្រកសមុទ្រ Hormuz ហើយចំណូលពីប្រេងមានចំនួនប្រហែល ៩០ភាគរយនៃថវិកាសហព័ន្ធរបស់ប្រទេសនេះ៕