(ឡុងដ៏)៖ ចក្រភពអង់គ្លេស បានរឹតបន្តឹងច្បាប់បរិច្ចាគថវិកានយោបាយពីបរទេស ជាផ្នែកមួយនៃកិច្ចប្រឹងប្រែង បញ្ឈប់លំហូរសាច់ប្រាក់បរទេស ដែលមានឥទ្ធិពលលើការបោះឆ្នោត និងចំពេលមានការព្រួយបារម្ភ ដែលរដ្ឋមន្ត្រីក្រសួងលំនៅដ្ឋាន លោក Steve Reed ហៅថាជា «លុយគួរឱ្យសង្ស័យ»។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី៦​ ខែកក្កដា ឆ្នាំ២០២៦។

ឆ្នាំមុន រដ្ឋាភិបាលអង់គ្លេស បានបញ្ជាឱ្យពិនិត្យឡើងវិញ ទាក់ទងនឹងអំពើជ្រៀតជ្រែកពីបរទេស ក្នុងឆាកនយោបាយដោយប្រើលុយ បន្ទាប់ពីអតីតអ្នកនយោបាយម្នាក់ក្នុងគណបក្ស Reform UK ត្រូវបានជាប់ពន្ធនាគារពីបទទទួលសំណូក សម្រាប់ការធ្វើសេចក្តីថ្លែងការណ៍គាំទ្ររុស្ស៉ី។

ការពិនិត្យឡើងវិញរកឃើញថា អង់គ្លេស ប្រឈមបញ្ហាលុយពីបរទេសយូរហើយ រួមទាំងជាមួយរុស្ស៉ី ចិន និងអ៉ីរ៉ង់ ដែលព្យាយាមជះឥទ្ធិពល និងធ្វើឱ្យខូចដល់លទ្ធិប្រជាធិបតេយ្យរបស់ប្រទេស ដែលជំរុញឱ្យរដ្ឋាភិបាលត្រូវដាក់ចេញនូវច្បាប់ថ្មី។ តាមក្រសួងលំនៅដ្ឋានអង់គ្លេស ចាប់ពីពេលនេះទៅ បេក្ខជននយោបាយត្រូវចូលខ្លួនប្រកាស សម្រាប់ថវិកាលើស ២,៩៧៣ពាន់ដុល្លារ ដែលទទួលបានមុនពេលក្លាយជាបេក្ខជន និងបញ្ជាក់ថាប្រភពនៃលុយនេះ។

ច្បាប់ដ៏តឹងរ៉ឹងជាងមុន ក៏មានន័យថា បុគ្គលដែលផ្លាស់ទៅចក្រភពអង់គ្លេសពីបរទេស ត្រូវរស់នៅអចិន្ត្រៃយ៍ក្នុងចក្រភពអង់គ្លេសរយៈពេល ១ឆ្នាំ មុនពេលអាចបរិច្ចាគថវិកានយោបាយ ក្នុងចំនួន ១០០ ០០០ផោន (១៣៣,៣២៩ដុល្លារ) ឬច្រើនជាងនេះ។ ការបរិច្ចាគពីក្រុមហ៊ុននានា ត្រូវវាយតម្លៃទៅលើការចំណាយបង់ពន្ធកន្លងមក ជាជាងប្រាក់ចំណូល ដើម្បីធានាថាមានតែអាជីវកម្ម ដែលមានទំនាក់ទំនងជាមួយចក្រភពអង់គ្លេសស្របច្បាប់ប៉ុណ្ណោះ ទើបអាចបរិច្ចាគបាន។

គួរបញ្ជាក់ថា ​មេដឹកនាំ​​គណបក្ស ​Reform UK​ ដែលជាបក្សប្រឆាំងនៅអង់គ្លេស គឺ​លោក Nigel Farage ​ស្ថិត​ក្រោម​ការ​ស៉ើបអង្កេត​ថា តើ​លោក​គួរ​ប្រកាស​ពី​ថវិកា​ ៦,៦៨លាន​ដុល្លារ ដែលបានមកពី​មហាសេដ្ឋី​រូបិយប័ណ្ណ​ឌីជីថល ​មាន​មូលដ្ឋាន​នៅ​ប្រទេស​ថៃ​ឬ​អត់ មុន​ពេល​លោក​ឈរឈ្មោះ​ជា​សមាជិក​សភា៕