(កូឡុំបូ)៖ ប្រភពពីកងកម្លាំងប៉ូលិស និងមន្ទីរពេទ្យ បានប្រាប់ទីភ្នាក់ងារសារព័ត៌មាន Reuters ថា ការប៉ះទង្គិចគ្នាយ៉ាងហិង្សារវាងក្រុមក្មេងទំនើងពីរក្រុម នៅក្នុងពន្ធនាគារប្រទេសស្រីលង្កា នៅថ្ងៃចន្ទនេះ បានបណ្តាលឱ្យមនុស្សយ៉ាងហោចណាស់ ២៥នាក់បាត់បង់ជីវិត និងប្រហែល ១០០នាក់ផ្សេងទៀតរងរបួស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន​ Reuters។

ប្រភពបានឱ្យដឹងថា អំពើហិង្សានេះបានផ្ទុះឡើងតាំងពីថ្ងៃអាទិត្យ មកម៉្លេះ រវាងក្រុមអ្នកទោសដែលត្រូវបានកាត់ទោសរួច និងក្រុមជនសង្ស័យដែលកំពុងជាប់ឃុំឃាំងបណ្តោះអាសន្ន នៅក្នុងពន្ធនាគារក្នុងទីក្រុងជាប់មាត់សមុទ្រ នេហ្គុំបូ (Negombo) ដែលស្ថិតនៅចម្ងាយប្រមាណ ៣៥គីឡូម៉ែត្រ ភាគខាងជើងនៃរដ្ឋធានីពាណិជ្ជកម្មកូឡុំបូ (Colombo)។ ទោះជាយ៉ាងណា មូលហេតុពិតប្រាកដដែលបង្កឱ្យមានការផ្ទុះហិង្សានេះ នៅមិនទាន់ត្រូវបានបញ្ជាក់ឱ្យដឹងច្បាស់នៅឡើយទេ។

ប្រភពពីកងកម្លាំងប៉ូលិសបានបន្ថែមថា បច្ចុប្បន្នអាជ្ញាធរកំពុងធ្វើការបោសសម្អាតទីតាំងនានានៅក្នុងពន្ធនាគារ ខណៈមន្ត្រីជំនាញកំពុងមមាញឹកក្នុងការប្រមូលទិន្នន័យជាក់លាក់អំពីចំនួនអ្នកស្លាប់ និងអ្នករបួស។ អ្នកនាំពាក្យកងទ័ព លោកឧត្តមសេនីយ៍ត្រី វ៉ារូណា ហ្គាម៉ាហ្ស (Waruna Gamage) បានបញ្ជាក់ប្រាប់ Reuters ថា កងទ័ពត្រូវបានស្នើសុំឱ្យជួយអន្តរាគមន៍កម្លាំងប៉ូលិស ប៉ុន្តែបច្ចុប្បន្នកំពុងស្ថិតក្នុងការប្រុងជើងការរង់ចាំបទបញ្ជានៅឡើយ៕