(អ៊ីល-ស៊ឺ-តេ)៖ អាជ្ញាធរបារាំងបានប្រកាសនៅថ្ងៃចន្ទថា ភ្លើងឆេះព្រៃដ៏សាហាវនៅភាគនិរតីប្រទេស បានបង្ខំឱ្យជម្លៀសប្រជាពលរដ្ឋជាង ១០,០០០នាក់ ចេញពីលំនៅឋាននៅក្បែរព្រំដែនប្រទេសអេស្ប៉ាញ ខណៈខ្យល់បក់បោកខ្លាំងកំពុងធ្វើឱ្យអគ្គិភ័យកាន់តែឆាបឆេះរាលដាល។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ឆ្លើយតបនឹងគ្រោះមហន្តរាយនេះ សហភាពអឺរ៉ុប (EU) បានបញ្ជូនយន្តហោះទម្លាក់ទឹកចំនួន ៤គ្រឿង ពីប្រទេសស៊ីប និងស៊ុយអែត មកជួយកងពន្លត់អគ្គិភ័យបារាំង។ អាជ្ញាធរក្នុងតំបន់បានបញ្ជាក់ថា ភ្លើងបានឆាបឆេះបំផ្លាញផ្ទៃដីប្រមាណ ៤,៦០០ហិកតារួចទៅហើយ ហើយរដ្ឋមន្ត្រីមហាផ្ទៃបារាំងបានសង្កត់ធ្ងន់ថា ស្ថានភាពអាកាសធាតុកំពុងមានការប្រែប្រួលកាន់តែអាក្រក់។ អគ្គិភ័យនេះក៏បានរំខានដល់ការប្រកួតប្រណាំងកង់ Tour de France ផងដែរ ដោយតម្រូវឱ្យមានការរឹតបន្តឹងការចូលរួមពីសាធារណជន ដើម្បីទុកផ្លូវសម្រាប់រថយន្តសង្គ្រោះបន្ទាន់។

ដោយឡែក នៅខាងប្រទេសអេស្ប៉ាញវិញ ភ្លើងបានឆេះបំផ្លាញផ្ទៃដី ២,២០០ហិកតា ភាគច្រើនជាតំបន់ការពារធម្មជាតិ។ ទោះជាយ៉ាងណា អាជ្ញាធរកាតាឡូនៀ (Catalonia) បានបញ្ជាក់ថា ភ្លើងត្រូវបានគ្រប់គ្រងបានហើយ ខណៈប៉ូលិសបានចាប់ខ្លួនជនសង្ស័យម្នាក់ ដែលត្រូវបានចោទប្រកាន់ថាបានបង្កឱ្យមានភ្លើងឆេះព្រៃដោយអចេតនា តាមរយៈការប្រើប្រាស់ម៉ាស៊ីនកាត់ដែកនៅតាមដងផ្លូវ។ បន្ថែមពីនេះ ការជម្លៀសពលរដ្ឋ ៥០០នាក់ផ្សេងទៀត ក៏ត្រូវបានធ្វើឡើងនៅភាគខាងត្បូងកាតាឡូនៀផងដែរ បន្ទាប់ពីភ្លើងឆេះព្រៃរាលដាលចូលឧទ្យានជាតិ៕