(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃចន្ទ បានបញ្ជាក់ថា លោកបានស្នើសុំឱ្យប្រធានសហព័ន្ធបាល់ទាត់អន្តរជាតិ (FIFA) លោក ជីអាននី អ៊ីនហ្វានទីណូ (Gianni Infantino) ធ្វើការពិនិត្យឡើងវិញនូវការពិន័យកាតក្រហមទៅលើខ្សែប្រយុទ្ធសហរដ្ឋអាមេរិក ហ្វូឡារីន បាឡូហ្គាន់ (Folarin Balogun) ដោយលោកយល់ថា ការកាត់ក្តីរបស់អាជ្ញាកណ្តាលគឺ «អាក្រក់បំផុត» និងមិនមានភាពយុត្តិធម៌នោះទេ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក ត្រាំ បានប្រាប់អ្នកសារព័ត៌មាននៅការិយាល័យពងក្រពើ (Oval Office) ថា «អ្វីដែលខ្ញុំបានធ្វើ គឺគ្រាន់តែសុំឱ្យមានការពិនិត្យឡើងវិញប៉ុណ្ណោះ ព្រោះខ្ញុំមិនគិតថាវាជាកំហុសនោះទេ»។ ការអន្តរាគមន៍ដែលមិនធ្លាប់មានពីមុនមកនេះ បានធ្វើឱ្យដំណើរការវិន័យរបស់ FIFA ក្លាយជាប្រធានបទក្តៅគគុកនៅលើឆាកអន្តរជាតិ និងបង្កឱ្យមានការខឹងសម្បារយ៉ាងខ្លាំងពីប្រទេសបែលហ្ស៊ិក (Belgium) ដែលត្រូវប្រកួតជាមួយអាមេរិកនៅថ្ងៃចន្ទ ដើម្បីដណ្តើមយកកៅអីវគ្គ ៨ក្រុមចុងក្រោយ។

ទន្ទឹមគ្នានេះ​ លោក ត្រាំ បានការពារថា ហេតុការណ៍ដែលនាំឱ្យកីឡាករ បាឡូហ្គាន់ ទទួលបានកាតក្រហមនោះ គ្រាន់តែជាការប៉ះទង្គិចគ្នារវាងកីឡាករពីរនាក់ដែលកំពុងរត់ក្នុងល្បឿនលឿនប៉ុណ្ណោះ វាមិនមែនជាកំហុសអ្វីឡើយ។ លោកក៏បានកោតសរសើរ FIFA​ ក្នុងការផ្អាកការពិន័យកាតក្រហមនេះ​​ ដោយចាត់ទុកថា ជាការសម្រេចចិត្តដ៏ «ឈ្លាសវៃបំផុត»​ ខណៈលោកអះអាងថា ក្រុមជម្រើសជាតិអាមេរិកចាំបាច់ត្រូវតែមានកីឡាករល្អបំផុតរបស់ខ្លួននៅលើទីលានប្រកួត។ ទោះជាយ៉ាងណា លោកបានសង្កត់ធ្ងន់ថា លោកគ្រាន់តែស្នើសុំឱ្យមានការពិនិត្យឡើងវិញប៉ុណ្ណោះ ដោយមិនមានសិទ្ធិបង្គាប់បញ្ជាឱ្យ FIFA ធ្វើអ្វីមួយនោះឡើយ៕