(អូស្លូ)៖ នាយករដ្ឋមន្រ្តីន័រវែស លោក Jonas ‌Gahr Stoere បាននិយាយកាលពីថ្ងៃចន្ទសប្តាហ៍នេះថា ន័រវែសចង់​ឱ្យចិនប្រើប្រាស់ចំណងមិត្តភាពរបស់ខ្លួន ជាមួយមេដឹកនាំរុស្ស៉ី ដើម្បីនាំមកនូវដំណោះស្រាយ ក្នុងកិច្ចចរចាសម្រាប់សង្គ្រាមនៅអ៊ុយក្រែន និងកែលម្អទំនាក់ទំនងរវាងទីក្រុងប៉េកាំង ជាមួយអឺរ៉ុប។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី៧ ខែកក្កដា ឆ្នាំ២០២៦។

លោក Stoere ប្រាប់ក្រុមអ្នកសារព័ត៌មាន បន្ទាប់ពីជួបរដ្ឋមន្រ្តីការបរទេសចិន លោក Wang Yi ក្នុងទីក្រុងអូស្លូ យ៉ាងដូច្នេះថា «ចិនទំនងជាប្រទេសដែលមានលទ្ធភាព ទាក់ទងជាមួយមេដឹកនាំរុស្ស៉ី បានដោយផ្ទាល់ និងល្អបំផុត។ យើងសង្ឃឹម និងជំរុញយ៉ាងខ្លាំងឱ្យចិនប្រើប្រាស់បណ្តាញនោះ។ ការពិភាក្សាកម្រិតខ្ពស់មួយនៃពួកគេ នឹងជួយអ៊ុយក្រែនបាន»។ លោក Stoere បន្ថែមថា «កិច្ចសហប្រតិបត្តិការកាន់តែស៉ីជម្រៅរវាងអឺរ៉ុប និងចិន មានសក្តានុពល ប៉ុន្តែដរាបណាសង្គ្រាមនេះនៅតែបន្ត ហើយចិនជាដៃគូជិតស្និទ្ធរបស់រុស្ស៉ី ឱកាសទាំងនោះគឺនៅមានកម្រិត»។

គួរបញ្ជាក់ថា លោក Wang បាននិងកំពុងធ្វើ​​ទស្សនកិច្ចក្នុងប្រទេស​ន័រវែស បន្ទាប់​ពីដាណឺម៉ាក ស៊ុយអែត និង​ហ្វាំងឡង់។ សេចក្ដីថ្លែងការណ៍​របស់​ចិន​ជុំវិញជំនួបនៅន័រវែស មិន​បាន​និយាយ​អំពី​​រុស្ស៉ីទេ គឺផ្ដោតតែ​លើ​កិច្ចសហប្រតិបត្តិការ​ទ្វេភាគី៕