(ញូវដែលី)៖ មន្រ្តីរដ្ឋាភិបាលឥណ្ឌា នាថ្ងៃអង្គារ ទី៧ ខែកក្កដា ឆ្នាំ២០២៦ បានឱ្យដឹងថា ឥណ្ឌានឹងផ្គត់ផ្គង់មីស៉ីលគ្រូសល្បឿនលឿនជាងសំឡេង BrahMos ព្រមទាំងមីស៉ីលសម្រាប់បំពាក់លើយន្តហោះចម្បាំង Astra ឱ្យទៅឥណ្ឌូណេស៉ី ស្របពេលដែលនាយករដ្ឋមន្រ្តីឥណ្ឌា​លោក Narendra Modi ចាប់ផ្តើមដំណើរបំពេញទស្សនកិច្ច២ថ្ងៃ នៅទីក្រុងហ្សាការតា។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កិច្ចព្រមព្រៀងមីស៉ីលខាងលើ មានតម្លៃខ្ទង់៦៣០លានដុល្លារ ហើយទំនងជានឹងត្រូវចុះហត្ថលេខា អំឡុងទស្សនកិច្ចរបស់លោក Modi តែម្តង។ កិច្ចព្រមព្រៀងនេះ នឹងជាការពង្រីកខ្លួនធំមួយ សម្រាប់វិស័យនាំចេញផលិតផលការពារជាតិរបស់ប្រទេសឥណ្ឌា ហើយនឹងធ្វើឱ្យកាន់តែស៉ីជម្រៅ នូវទំនាក់ទំនងយុទ្ធសាស្រ្តជាមួយឥណ្ឌា ដែលជាប្រទេសមានសេដ្ឋកិច្ចធំជាងគេ នៅអាស៉ីអាគ្នេយ៍ ចំពេលមួយដែលមានការប្រកួតប្រជែងឥទ្ធិពលកើនឡើងជាមួយចិន នៅក្នុងតំបន់ឥណ្ឌូ-ប៉ាស៉ីហ្វិក។

មីស៉ីល BrahMos ដែលផលិតឡើងរួមគ្នារវាងឥណ្ឌានិងរុស្ស៉ី គឺស្ថិតក្នុងចំណោមមីស៉ីលគ្រូស ដែលមានល្បឿនលឿនបំផុតមួយ នៅលើពិភពលោក ហើយគេអាចប្រើវាបាញ់ចេញពីប្រព័ន្ធនៅលើដីគោក នាវាចម្បាំង និងយន្តហោះចម្បាំង។ ចំណែក មីស៉ីល Astra គឺអាចយកទៅបំពាក់នៅលើ យន្តហោះចម្បាំងផលិតដោយរុស្ស៉ី Sukhoi របស់កងទ័ពអាកាសឥណ្ឌូណេស៉ី។

គួរបញ្ជាក់ថា ចំណាប់អារម្មណ៍ចំពោះមីស៉ីល BrahMos បានកើនឡើង ចាប់តាំងពីសង្រ្គាមរយៈពេល៤ថ្ងៃរបស់ឥណ្ឌា ជាមួយ​ប៉ាគីស្ថានកាលពីឆ្នាំ២០២៥ នៅពេលដែលទីក្រុងញូវដែលី បានប្រើប្រាស់មីស៉ីលនេះ ក្នុងការប្រយុទ្ធជាលើកដំបូងបង្អស់។ កន្លងមក ឥណ្ឌាបានចុះកិច្ចព្រមព្រៀងលក់មីស៉ីល BrahMos ឱ្យទៅវៀតណាមនិងហ្វីលីពីន ហើយប្រទេសជាច្រើនផ្សេងទៀត ​បានបង្ហាញការចាប់អារម្មណ៍ ក្នុងនោះរួមមានទាំងប្រទេសសេដ្ឋីប្រេង អេមីរ៉ាតអារ៉ាប់រួម៕